“Кәсіподақтар үйінде” Қызылорда облысы кәсіподақтар орталығы аумақтық кәсіподақтар бірлестігінің төрағасы С.Сермағанбетов өткен жылды қорытындылап, алдағы уақытта атқарылатын жұмыстар бойынша есеп берді. Оған облыс әкімінің орынбасары Қуанышбек Ысқақов, басқарма басшылары мен салалық, жергілікті, бастауыш кәсіподақ ұйымдарының төрағалары қатысты.
Қазіргі күні облыстың аумақтық кәсіподақтар бірлестігі 11 салалық кәсіподақта 1036 ұйымды біріктіреді. Оның ішінде 2 салалық кәсіподақ ұйымы жыл басында құрылған. Есепті кезеңде кәсіподақ мүшелерінің өсу деңгейі байқалады. Бірлестік өкілдері өңірде облыстық, қалалық, комиссиялар, жұмыс топтары, арнайы штабтар, барлығы 16 түрлі тұрақты жұмыс органы құрамында әлеуметтік әріптестермен бірлесіп жұмыс атқарады.
– Өткен жылы еңбек және әлеуметтік мәселелер бағытындағы ортақ мүдделі жұмыстарды жүйелі жүргізу мақсатында аумақтық кәсіподақтар бірлестігі облыстық кәсіпкерлер палатасымен, ҚР мемлекеттік қызмет істері және сыбайлас жемқорлыққа қарсы іс-қимыл агенттігінің облыстық департаменті, татуласу орталығы, облыстық статистика департаменті мен облыс әкімі аппаратының әдеп жөніндегі уәкілімен өзара ынтымақтастық туралы меморандумға қол қойды. Соның негізінде жұмыс орындарын қысқартуды, жалақы қарыздарын болдырмау секілді мәселелер бойынша бірқатар жұмыстар жасалды. Мәселен, “Айдан Мұнай” АҚ, Байқоңыр қаласындағы облыстық медициналық орталық филиалы, Қазалы туберкулез аурулары ауруханасындағы еңбек пен жалақыға қатысты мәселелердің даусыз шешілуіне үлес қостық. Сондай-ақ, “Қызылорда су жүйесі” МКК жұмыскерлердің қысқартылуына байланысты туындаған мәселеде біздің бірлестіктің бақылауымен еңбек заңнамалары мен мекемедегі ұжымдық шарт ережелерінің бұзылуына жол берілмеді. Қысқартылуға жатқызылған 85 штаттық қызметкердің 73-не жұмыс орындары қарастырылуына қол жеткіздік, – деді С.Сермағанбетов.
Айта кету керек, облыста тіркелген 7289 мекеменің ішінде 769-ы жұмысын тоқтатқан. 277 мекеме жойылу кезеңінде тұрса, 6243 мекеме мен кәсіпорын нақты жұмыс атқаруда. Есепті мерзімде 6005 мекеме мен кәсіпорынның ұжымдық шарттары тіркелген. Жалпы жұмыс орындарының ұжымдық шартпен қамтылу деңгейі 96 процентті құрайды.
Есеп беру барысында облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Айгүл Ибраева “2018-2020 жылдарға арналған облыстық келісім” аясында атқарылған жұмыстарды сөз етсе, облыстық еңбек саласындағы бақылау басқармасының басшысы Ертілеу Жалғасбаев еңбек заңнамалары және еңбек қауіпсіздігін сақтау мен бақылау бойынша жүзеге асқан жұмысқа тоқталды. Ал, облыстық ішкі саясат басқармасының басшысы Талғат Маханов сотсыз татуласу орталығының өңір үшін маңыздылығын сөз етті.
Жиын соңында қатысушылар тарапынан сұрақтар қойылып, ұсыныстар айтылды. Ал, облыс әкімінің орынбасары Қ.Ысқақов аумақтық кәсіподақ бірлестігінің жұмысына оң бағасын берді.
Мейрамгүл ДАУЫЛБАЙҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
