А.Тоқмағамбетов атындағы мәдениет үйінде Мемлекеттік кірістер органының құрылғанына 5 жыл толуына арналған салтанатты жиын өтті.
Салтанатты жиынды ашқан облыс әкімінің орынбасары Бақыт Жаханов осыдан бес жыл бұрын Елбасы Жарлығымен Салық және Кеден комитеттерін қосу жолымен, сондай-ақ тарқатылған экономикалық және сыбайлас жемқорлыққа қарсы күрес агенттігінің қаржылық және экономикалық қылмысты тергеу функциясын бере отырып, ҚР Қаржы министрлігінің Мемлекеттік кірістер комитетін құру жүзеге асқанын атап өтті. Міне, осы уақыттан бері аталған комитеттің облыс бойынша департаменті Сыр өңірінің болжамдалған кіріс көздері бойынша салықтық және басқа да міндетті төлемдердің бюджетке түсуін қамтамасыз етіп келеді. Облыс әкімінің орынбасары департамент ұжымына және сала ардагерлеріне жылы лебізін білдіріп, облыс әкімі Қуанышбек Ысқақовтың құттықтауын жеткізді.
«Тәуелсіз Қазақстанның және Сыр елінің қазынасын көбейтіп, кірісін арттыруға, сол арқылы өсіп-өркендеуіне сүбелі үлес қосып келе жатқандарыңыз үшін ризашылығымды білдіремін. Сіздер өңір кірісін молайтып қана қоймай, сонымен қатар салық төлеушілердің құқықтық сауаттылығын арттыруға тынбай еңбек етіп келесіздер. Алдағы уақытта да ел мүддесі мен халық игілігі жолында аянбай жұмыс жүргізе беретіндеріңізге кәміл сенемін. Қажырлы еңбектеріңізге табыс, өздеріңізге мықты денсаулық, отбасыларыңызға амандық тілеймін!» делінген аймақ басшысының құттықтауында.
Салтанатты жиында мемлекеттік кірістер жүйесінің дамуына елеулі үлес қосқан сала мамандары облыс әкімінің «Алғыс хатымен», «Мемлекеттік кірістер органының үздігі» төсбелгісімен, Қаржы министрлігінің «Құрмет грамотасымен» марапатталды.
Сондай-ақ «Nur Otan» партиясы облыстық филиалы төрағасының бірінші орынбасары Ақмарал Әлназарова, мемлекеттік кірістер органы ардагерлер кеңесінің төрағасы Дайрабай Ысқақов, облыс бойынша мемлекеттік кірістер департаментінің басшысы Ғалымжан Орынов құттықтау лебіздерін жеткізді. Ардагерлер мен сала мамандарына мемлекеттік кірістер комитетінің «Құрмет грамотасы» мен «Алғыс хаты», «Nur Otan» партиясының «Алғыс хаты», департаменттің «Құрмет грамотасы» және «Алғыс хаты» табыс етілді. Сондай-ақ, «Үздік салық төлеуші», «Сыртқы экономикалық қызметтің үздік қатысушысы» және «Үздік кедендік брокер» номинациялары бойынша «Автомобиль жол басқармасы», «СПК Қызылорда балық» және «Краун Триумф» жауапкершілігі шектеулі серіктестіктері марапатталды. Департаменттің сан-салалы қызметін қоғамға танымал етіп жариялауға үлес қосып жүрген бірқатар журналистерге де құттықтаулар табыс етілді.
Шара соңы әншілер мен бишілер және департаменттің өнерпаз мүшелері қатысқан концертпен өрнектелді.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
