Шиелі кентіндегі «Арман» мәдениет үйінде аудандық ардагерлер кеңесінің кезекті ІХ конференциясы өтті. Бес жылда бір өтетін жиынға бастауыш ұйымдардан сайланған делегаттар және ауыл әкімдері, мекеме басшылары қатысты.
Конференцияның ашылуында аудан әкімі Айтбай Жандарбеков сөз сөйлеп, Мемлекет басшысы Қасым-Жомарт Тоқаевтың бастамалары, Үкіметтің әлеуметтік саясаттағы басым бағыттары және облыс әкімі айқындап берген міндеттер аясында ардагерлерге жан-жақты қолдау көрсету, аға буынның өмірлік тәжірибесін жастар тәрбиесіне тиімді пайдалану басты назарда екенін атап өтті. Сонымен қатар, ел бірлігі мен тұрақтылығын сақтауда үлкендердің сара жолы мен тағылымды өнегесінің айрықша маңызға ие екенін жеткізді.
Конференцияда аудандық ардагерлер кеңесінің төрағасы Өркен Исмаил атқарылған жұмыстар туралы баяндама жасап, ардагерлер ұйымдарының белсенділігі мен жүзеге асырылған іс-шараларға кеңінен тоқталды. Қазіргі кезде 9697 ардагер 50 бастауыш ұйымда есепте тұрады. Өткен конференция кезінде бастауыш ұйым саны небәрі 32 болса, осы аралықтағы ізденіс пен қарқынды жұмыс арқасында әрбір адам мұқият есепке алынып, қамқорлық аясына топтастырылғандығы аңғарылады. Сондай-ақ олардың әлеуметтік жағдайы, медициналық көмек қажеттілігі, нақты өмірге белсенді араласу тұрғысында көп жұмыс атқарылған. Туристік саяхаттар, мәдени-спорт жарыстарын ұйымдастыру, т.б. шаралар тұрақты өткізіледі. Осы мәселелерге тоқталған төраға елдің ынтымақ-бірлігі туралы да өз тұжырымдарын ортаға салды.
Жарыссөзге шыққан аудандық әжелер кеңесінің төрайымы Айжамал Әбдіхамитқызы, Шиелі кенті ардагерлер кеңесінің төрағасы Болат Күлімбет, Тартоғай ауылдық ардагерлер кеңесінің төрағасы Басаман Пірімбетов ардагерлердің қоғамдағы орны мен ел келешегіне қатысты ой-пікірлерін бөлісті.
Күн тәртібіндегі мәселелерді талқыланған соң Шиелі аудандық ардагерлер кеңесінің пленум мүшелігіне 49, аудандық ардагерлер кеңесінің алқа мүшелігіне 11 адам бекітілді. Сондай-ақ аудандық ардагерлер алқасының шешімімен төрағалыққа Өркен Исмаил бірауыздан қайта сайланды.
Конференция шешімімен облыстық ардагерлер кеңесінің пленум мүшелігіне аудан атынан 4, облыстық конференцияға делегат болып 4 ардагер ұсынылды.
Жиын соңында облыстық ардагерлер кеңесінің алқа мүшесі Бақыт Нұртазаев қолға алынған жұмыстарға тоқтала келе, алдағы міндеттерді де атап өтті. Жуантөбе ауылдық ардагерлер кеңесінің төрағасы Ж.Машрапинге «Облыстың құрметті ардагері» төсбелгісін табыс етті. Қоғамдық келісім мен ұрпақ тәрбиесіне сүбелі үлес қосып жүрген белсенді ардагерлер де марапатталды.
Н.НАЗЫМХАНҰЛЫ.
Шиелі ауданы.
