Республикалық маңызы бар автомобиль жолдарының сапасын тексеру бойынша «Халықтық бақылау» жобасы іске қосылады. Бұл туралы «ҚазАвтоЖол» ҰК» АҚ басқарма төрағасы Дархан Иманашев айтты, – деп хабарлады «Қазақпарат».
2025 жылғы 1 мамырдан бастап республикалық маңызы бар автомобиль жолдарының сапасын тексеру бойынша кең ауқымды «Халықтық бақылау» жобасы іске қосылады. Жобаның мақсаты – еліміздің әрбір азаматын салынып жатқан республикалық маңызы бар автомобиль жолдары бойынша қоғамдық бақылауға шақыру.
– «ҚазАвтоЖол» ұлттық компаниясы өз кезегінде анықталған кемшіліктер мен мәселелерге ден қойып, оны қысқа мерзімде шешуді қамтамасыз етпек. Жобаға қатысу үшін 1403 байланыс орталығына хабарласып, өтінім қалдыру керек. Нысандарды аралау кестесін «ҚазАвтоЖол» ұлттық компаниясының www.qaj.kz ресми сайтынан көруге болады, – деді басқарма төрағасы Орталық коммуникациялар қызметіндегі брифингте.
Анонимді және қауіпсіз: Қылмысты ашуға көмектесе аласыз
ІІМ есірткі қылмыстары туралы анонимді хабарламаларға арналған телефон нөмірлерін жариялады, – деп хабарлайды Tengrinews.kz.
– Жаңа есірткі қаупінің тез таралуына, жастарды заңсыз есірткі айналымына тартуда цифрлық арналардың қолданылуына байланысты балаларымызды, жақындарымызды және еліміздің болашағын қорғау үшін күш біріктіруіміз қажет. ІІМ Есірткі қылмысына қарсы іс-қимыл комитеті есірткі қылмыстарын, әсіресе, оған кәмелетке толмағандарды тарту жағдайларын анықтау, жолын кесу және алдын алу бағытында бар күш-жігерін салып жұмыс істеп жатыр, – деді ІІМ Есірткі қылмысына қарсы іс-қимыл комитеті төрағасының міндетін атқарушы Данияр Мейірхан.
Ол бұл мәселені тек құқық қорғау органдарының күшімен шешу мүмкін емес екенін айтты.
– Сіздерді бейжай қалмауға шақырамыз. Балалар мен жасөспірімдердің мінез-құлқындағы өзгерістерге назар аударыңыздар. Заңсыз сату бойынша күдік тудыратын интернет ресурстарға, граффити мен кодтары бар жарнамаларға мән беріңіздер, – деді Данияр Мейірхан.
Маңызды ақпаратты анонимді және қауіпсіз түрде хабарлауға болады. Бұл қылмыстың алдын алып, біреудің өмірін құтқаруға көмектесуі мүмкін.
Аутизмнің артуына екпенің әсері бар ма?
Үкімет отырысынан кейін өткен брифингте Денсаулық сақтау министрі Ақмарал Әлназарова балалардың екпесіне қатысты сұраққа жауап берді, – деп хабарлайды BAQ.KZ.
Кейбіреулер аутизммен ауыратын балалар санының артуына екпе әсер етіп жатыр деген ойда. «Балалар денсаулығындағы бұл ауытқуға екпенің қатысы бар ма?» деп сауал қойды журналист. Министр бұл пікірдің негізсіз екенін кесіп айтты.
– Бұл – миф. Себебі барлық мемлекет екпенің көмегімен балаларды инфекциядан қорғап келеді. Сондықтан мұны екпемен байланыстыруға болмайды, – деді министр.
Ведомство басшысының айтуынша, аутизм диагнозының жиі қойылуы медицинаның дамып, ерте анықтау мүмкіндігінің артқанымен байланысты.
– Аутистикалық ауытқуы бар балалардың саны артып жатқандай көрінеді. Бірақ бұл – шын мәнінде ерте диагностиканың нәтижесі. Ауытқуды ерте анықтау өте маңызды. Себебі алдын ала ем жасап, бала мектеп жасына жеткенше қоғамға бейімделуіне көмектесуіміз керек, – деді Ақмарал Әлназарова.
«СБ» ақпарат
