Қаңтардың басындағы тәртіпсіздіктерге байланысты ұсталғандардың құқығын қорғау үшін құрылған қоғамдық бақылау комиссияларының өкілдері қылмыстық атқару жүйесінің барлық мекемелеріне кедергісіз кіре алады. Ішкі істер министрлігінің ресми өкілі Нұрділдә Ораз онлайн брифингіде осылай айтты, деп хабарлайды ҚазАқпарат тілшісі.
«Жаппай тәртіпсіздік барысындағы қылмыстары үшін қылмыстық атқару жүйесінің мекемелеріне 731 адам жеткізілді. Оның ішінде 20-сы соттар және прокуртура органдарының шешімімен үйқамаққа алуға немесе ешқайда кетпеу туралы қолхатқа ауыстырылды. Қазіргі уақытта тергеу изоляторында 711 адам бар. Олардың бәрі соттардың санкциялары негізінде ұсталған», – деді ресми өкіл.
Сонымен бірге, ол азаматтар құзырлы органдар шығарған бұлтартпау шарасымен келіспеген жағдайда прокуратура органдарына жүгіне алатынын еске салды.
«Айта кету керек, Ұлттық алдын алу тетігі мен қоғамдық бақылау комисиялары өкілдерінің қылмыстық атқару жүйесінің барлық мекемелерінде кедергісіз кіру мүмкіндігі бар. Бұл ретте адвокаттарды өз қорғаушыларына жіберу және сәлемдемелерді беру әдеттегі режимде жүзеге асырылады. Барлық өңірлердің коронавиурс инфекцияларымен сырқаттану деңгейі бойынша «қызыл» аймақта орналасқанын ескере отырып, санитарлық-эпидемиологиялық іс-шаралар қатаң сақталады. ІІМ Қылмыстық атқару жүйесі комитетінде және өңірлік департаменттердің бәрінде Call-орталықтар ұйымдастырылған. Осы орталыққа тергеудегі адамдар жайында және басқа да мәселелер туралы ақпарат алу үшін жүгінуге болады. Call-орталықтар адвокаттар да хабарласа алады», – деді Нұрділдә Ораз.
>>> Біздің Facebook, Instagram парақшаларымыз бен Telegram каналымызға жазылыңыз! <<<
