1995 жылы Ұлт Көшбасшысы Нұрсұлтан Назарбаевтың ұйғарымымен Қазақстан халқы Ассамблеясы құрылды. Бұл кезінде тағдырдың жазуымен қазақ даласына қоныс тепкен тегі бөлек болғанымен, тілегі бір, арманы ортақ тұтас халықты бір мүддеге ұйыстыруды көздеуден туған идея болатын.
Міне, биыл елімізде қоғамдық тұрақтылық пен ұлтаралық келісімді нығайтып, барлық ұлтты бір мақсат, бір мүдде жолында тоғыстырып отырған құрылым – Қазақстан халқы Ассамблеясына 25 жыл. Ел тұрақтылығының ұйтқысына айналған бұл институт – Қазақстанның Тұңғыш Президенті-Елбасы Нұрсұлтан Назарбаевтың ұтқыр идеясы ғана емес, бірлік пен келісімнің бірегей моделі. Сондай-ақ, ол – бейбітшілік пен рухани келісім мәдениетінің негізіне айналды.
Ширек ғасырда ассамблея консультативтік-кеңесші органнан Парламентте өкілдігі бар жалпыұлттық институтқа айналды. Бұл туралы Нұрсұлтан Назарбаев “Ассамблея – азаматтық қоғамға тән әмбебап құрылымның озық үлгісін көрсете білді. Достық, бейбітшілік, тыныштық пен сенім қоғам өмірінің ажырамас бөлігіне айналуына маңызды үлес қосты. БҰҰ, ЕҚЫҰ сияқты іргелі ұйымдар еліміздің ұлтаралық қатынастар моделіне және ұлт бірлігін нығайтуға бағытталған күш-жігеріне үнемі жоғары баға беріп келеді. Сондықтан ассамблея елімізде тұратын барлық этнос өкілдерінің ортақ тілегі мен ұмтылысының арқасында құрылды. Ассамблея – бүкіл халқымыз бірлесіп көтерген ортақ бір шаңырақ” деп ерекше атап өтті.
Расымен, ҚХА – сан түрлі ұлтты бір арнаға тоғыстыра білген еліміздегі бірден бір құрылым. Ол өзінің құрылған кезінен бастап орасан біріктірушілік және зияткерлік әлеует жинақтап және халықтық дипломатия институты үлгісіне бейімделе отырып, ұзақ даму жолынан өтті. Жыл өткен сайын оның маңыздылығы артып, ауқымы кеңеюде.
Бүгінде Сыр өңірінде де Қазақстан халқы ассамблеясының барлық құрылымдары қалыптасып, жемісті жұмыс жүргізіп келеді. Облыстық ассамблеяның құрамында 11 этномәдени, аудандарда 6 этно бағыттағы бірлестік, 118 аналар кеңесі, 165 қоғамдық келісім кеңесі, 1 ғылыми-сарапшылық топ, 1 медиация кабинеті, Қорқыт ата атындағы университетте «Қазақстан халқы ассамблеясы» кафедрасы, депутаттар және кәсіпкерлер тобы, журналистер мен сарапшылар клубы, «Жаңғыру жолы» жастар қозғалысы бар. Оларға барлық жағдай жасалған. Мәселен, әр ұлттың өзіндік құндылықтарын, салт-дәстүрі мен әдет-ғұрыптарын, болмысын сақтауда этномәдени бірлестіктердің мәдени күндері, әр этностың: “Наурыз”, “Масленица”, “Рождество”, “Сабантой”, “Сольналь”, “Песах”, “Пасха” сынды ұлттық мерекелері тұрақты түрде кеңінен аталып өтіледі. Бұл мерекелер бір ұлттың ғана емес, жалпыға ортақ мейрам ретінде тойлануда. Өз кезегінде мұндай шаралар, барлық этностың ауызбіршілікте өмір сүруіне, қоғамдық келісімнің нығаюына үлкен ықпал етіп отыр.
Жалпы ҚХА – келелі істерге ұйытқы болып, елдегі этносаралық толеранттылық пен келісімнің, ұлттар мен ұлыстардың арасындағы татулық пен бірліктің, қоғамдағы тұрақтылықтың алтын көпірге айналды. Бұл елдегі ауызбіршіліктің үстем екендігін көрсетсе керек.
>>> Біздің Facebook, Instagram парақшаларымыз бен Telegram каналымызға жазылыңыз! <<<
