Биыл Қызылорда қаласындағы байырғы білім беру мекемесінің бірі С.Сейфуллин атындағы № 4 ІТ мектеп-лицейінің құрылғанына 60 жыл толды. Айтулы датаға орай мектеп ұжымы ауқымды шаралар ұйымдастырып, барша түлектеріне сый-құрмет көрсетті.
Осы мектептен түлеп ұшқан азаматтардың бірі – кәсіпкер-меценат, «УАД» ЖШС-ның директоры Мұрат Үдербаев. Серіктестік директоры мектеп бітіргеніне биыл 50 жыл толуына орай өзі білім алған алтын ұяның аумағын көгалдандырып, абаттандыру ісін қолға алды.
Кеше аймақ басшысының тапсырмасына сәйкес, аталған білім беру мекемесіне барған Қызылорда қаласының әкімі Нұржан Ахатов атқарылып жатқан жұмыстардың барысымен танысты. Кәсіпкер, «УАД» ЖШС-ның директоры Мұрат Пірмағамбетұлы абаттандыру шараларын жақын күндері аяқтап, жасыл-желекке күтім жасауды жалғастыра беретінін жеткізді.
Сонымен қатар, қала әкімінің ұсынысына сәйкес, «УАД» мекемесінің демеушілігімен шаһар іргесіндегі «Ягодка» және «Пищевик» саяжайларының басты көшесіне тас төсеу жөнінде келісім жасалды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
