Қазақстан Республикасы Жер кодексінің нормаларына сәйкес кәсіпкерлік мақсатта жерді рәсімдеудің 2 жолы көрсетілген.
Бірінші жолы – ҚР Жер кодексінің 48-бабында көрсетілген ерекше жағдайларға сәйкес жер учаскесін сауда-саттықсыз (аукционсыз) алу (аталған жағдайда инвестициялық жобаларды іске асыру үшін).
Ол үшін сіздің белгілі бір өндіріспен айналысу жөніндегі жобаңыз мемлекет тарапынан қолдау тауып, облыс әкімдігінің жанындағы Жобаларды индустрияландыру картасына және өңірлер кәсіпкерлігін қолдау карталарына енгізу жөніндегі өңірлік үйлестіру кеңесінен инвестициялық жоба ретінде танылуы қажет.
Жобаны инвестициялық жоба деп тану мәселесі бойынша облыстық индустриялық-инновациялық даму басқармасына тиісті өтінішпен жүгіну керек.
Жоғарыда аталған кеңес отырысында сіздің жобаңыз инвестициялық жоба ретінде мақұлданғаннан кейін қажетті жер учаскесін сұрап, ҚР Жер заңнамаларына сәйкес рәсімдеу жөнінде әкімдікке өтінім жолдайсыз. Осы өтінім негізінде тиісті жер учаскесін рәсімдеу жұмыстары жүргізіледі.
Екінші жолы – Қазақстан Республикасы Ұлттық экономика министрінің 31.03.2015 жылғы №290 бұйрығымен бекітілген Жер учаскесін немесе жер учаскесін жалдау құқығын сату жөніндегі сауда-саттықты (конкурстарды, аукциондарды), оның ішінде электрондық түрде, ұйымдастыру мен өткізу қағидаларына сәйкес жер учаскесін сауда-саттық арқылы алу.
Бұл жағдайда жер учаскесі орналасқан жердегі жергілікті атқарушы органға қызығушылық танытқан жер учаскесіне қатысты өтініш білдіріп, сауда-саттыққа қатысуыңыз қажет.
Сауда-саттық нәтижесімен жеңімпаз деп танылған жағдайда, жер учаскесін сол тұлғаға рәсімдеу бойынша шаралар атқарылатын болады.
Облыстық жер қатынастары басқармасы
>>> Біздің Facebook, Instagram парақшаларымыз бен Telegram каналымызға жазылыңыз! <<<
