Облыс әкімі Гүлшара Әбдіқалықова жаңадан сайланған өңірлік кәсіпкерлер кеңесінің мүшелерімен кездесіп, осы саладағы ортақ мәселелерді талқылады деп хабарлайды облыс әкімінің баспасөз қызметі.
– Өңірлік кәсіпкерлер кеңесінің үшінші сайлауында 8000-нан аса сайлаушы-кәсіпкер Сіздерге дауыс беріп, таңдау жасады. Электоралды кампания кезінде өздеріңіздің жоғары кәсіби деңгейлеріңізді көрсету арқылы жеңіске жеттіңіздер. Бүгінгі күні кәсіпкерлік саласын дамыту бағытында облыс әкімдігі өңірлік кәсіпкерлер палатасымен тығыз байланыста жұмыс жасауда. Сол себептен бүгінгі кездесуді ұйымдастырып отырмын, – деді облыс әкімі.
Кездесуде облыс басшысы бизнес қауымдастық өкілдерінің өзекті мәселелерінің шешілуіне және кәсіпкерлерге қолдау көрсету бағытында тұрақты көмектің бар екенін атап өтті. Сонымен бірге шағын және орта бизнес иелерінің жобалары қолдау табатынын жеткізді.
– «Қызылорда» өңірлік инвестициялық орталығы ауылдық елді мекен кәсіпкерлерінің жобаларын жеңілдікпен несиелендіруде үлкен сұранысқа ие микроқаржы ұйымы болып отыр. Оның қызметі қолданыстағы заңнамаларға сәйкес 2020 жылдың 31 қазанына дейін шектелген болатын. Дегенмен, біз Орталық қызметін 2025 жылдың 31 желтоқсанына дейін ұзарттық. Жобаны қаржыландыру үшін әртүрлі қаржы көздерінен 1,2 млрд теңге қаржы тартылды. Осыған орай Қызылорда облысының 2023 жылға дейінгі экономикалық даму жоспарын жасадық, – деді облыс әкімі.
Кеңес мүшелерімен кездесуде сондай-ақ карантин уақытында бизнес субъектілерінің 75 процентінің жұмысы уақытша тоқтағаны ескеріліп, кәсіп иелеріне тұрақты қолдау болғаны айтылды.
Мәселен, төтенше кезең уақытында өңірде 51 мыңнан аса шағын және орта бизнес субъектісіне салықтық жеңілдіктер берілген. 8 мыңға жуық кәсіпкердің несие төлемдері кейінге шегеріліп, сауда нысандары 700,0 млн теңгеге жалға алу төлемдерінен босатылды. Мұнан бөлек, «Бизнестің жол картасы-2025» бағдарламасын іске асыруға бөлінген қаржы 1,7 млрд теңгеден 2,9 млрд теңгеге дейін ұлғайтылды.
Карантиннен кейін кәсіпкерлер бизнесін әртараптандыруға көшті. Аймақта тоқтап тұрған тойханалардың қызметін өндіріске бағыттау жұмыстары да жүргізілуде. Бүгінгі күннің өзінде 9 тойхана өз қызметін басқа салаға ауыстыруға дайын.
Басқосуда кеңес мүшесі, «K-GroupLTD ЖШС директоры Қайрат Боранбаев пен кәсіпкер Айткүл Әбдіқадырова сөз алып, кәсіпкерлікке бағытталған гранттар мен өндіріс орындарын ашу мәселесін сөз етті. Сондай-ақ, кәсіпкер Манарбек Еспенбетов құрылыс саласының мамандарын даярлауда жас мамандарды тәжірибе алаңына тарту мәселесін көтерді.
Өз кезегінде аймақ басшысы жаңа өндіріс нысандарын ашу арқылы бағыттас шағын өндірістер құрып, тұрақты жұмыс көздерін тауып, кәсіпкерлерді оқыту мәселелеріне жете мән беру қажеттігін қаперге салды. Сонымен қатар осы кезге дейін өңірлік кеңес төрағасы қызметін атқарған, пандемия кезеңінде халық қажеттілігіне орай қызмет көрсеткен кәсіпкер Дінмұхамед Абизовқа «Халық алғысы» медалін табыстады.
Жиын соңында облыс әкімі биылғы жылы 26 млрд теңгені құрайтын 108 жобаны іске асыру арқылы өңірде 2000-ға жуық жаңа жұмыс орны құрылып, кәсіпкерлерге қолайлы жағдай жасалатынын атап өтті.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
