Қоғамдағы қызметтің қай түрі болмасын, өзіне тән қиындығы мен жауапкершілігі бар. Соның ішінде адам жанының арашашысы – ақ халаттылардың жұмысы тіпті күрделі екені белгілі. Мейіргер болудың өз машақаты бар. Олар – мейірімі мен жан жылуы, төзімділігі мен ісіне беріктігі арқылы науқастың кеселінен айығуына үлкен ықпал тигізетін жандар. Статистикаға сүйенсек, медициналық мекемелердегі барлық жұмыстың 80 пайызын мейіргерлер атқарады екен. Ендеше нағыз еңбек адамы деп осы мамандық иелерін айтса болатын шығар.
Биыл Мемлекет басшысының Жарлығымен «Жұмысшы мамандықтар жылы» болып жарияланғаны белгілі. Ол мамандықтар қатарында мейіргер де бары қуантады.
Мамандығын мақтан тұтатын, қызметіне адал, алдына келген науқасқа жанашырлық пен мейірімін төгетін, сол арқылы алғысқа бөленіп жүрген жанның бірі – облыс орталығындағы № 3 қалалық емхана мейіргері Тымар Мықтыбаева.
Тымар Ізбасарқызы Жалағаш ауданы «Таң» ауылында дүниеге келген. №118 қазақ орта мектебінде білім алған ол 1997 жылы Қызылорда медицина колледжіне оқуға түсті. Еңбек жолын 2002 жылы №1 қалалық емханада аймақтық мейіргер болып бастады. Сол жерде он жылдай еңбек ете жүріп, мейіргерлік істің қыр-сырына қанығып, тәжірибе жинады. 2012 жылы №3 қалалық емхана ашылып, сонда ауысады. Содан бері осы емханада аймактық мейіргер болып жұмыс істейді.
Тымар кәсіби біліктілігін көтеру үшін үнемі ізденіп, оқып жүреді. 2023 жылы «Болашақ» жоғары медициналық колледжін «Мейірбике ісі» бойынша (бакалавриат) бітірді. Қазіргі кезде С.Асфендияров атындағы Қазақ ұлттық медицина университетінде мейірбике ісі бойынша бакалаврда оқиды.
– Еңбек жолымды бастағанда алғашқы дәрігерім Ералиева Шолпан Өтегенқызы, алғашқы мейіргерім Гүлсім Досаева еді. Ол кісілерден үйренгенім көп болды. Мейіргерлік істің қыр-сырын үйретіп, жауапкершілік жүгін абыроймен алып жүруді санама сіңірді. Үнемі ақыл-кеңестерін айтып, бай тәжірибелерімен бөлісті. Сол кісілерден үйренгеніміз әлі күнге дейін пайдамызға жарап келеді. Бүгінде өзіміз де жас буынға ақыл айтып, бағыт-бағдар беретін жасқа жеттік. Бірақ қанша жасқа келсек те, алдыңғы буын апаларымыздан алған тәлім-тәрбиеміз бізге өмірлік бағдаршам болып қала береді, – дейді Тымар.
Өз ісіне үлкен жауапкершілікпен қарайтын Тымар Ізбасарқызы жүрек қалауымен келген мамандығын мақтаныш етеді. Оның еңбегі лайықты бағасын алып та жүр. Мәселен, 2018 жылы облыстық денсаулық сақтау басқармасының Құрмет грамотасын алса, 2019 жылы «Жүкті, босанатын, босанған әйелдерге және ұрпақты болу жасындағы әйелдерге медициналық көмек көрсетудің үздік мейірбикесі» байқауында номинациямен марапатталды. 2020 жылы облыстық денсаулық сақтау басқармасының Құрмет грамотасына, 2021 жылы «Үздік туу жасындағы әйелдерді бақылау медбикесі», 2023 жылы «Үздік аймақтық мейіргер» номинацияларына ие болды.
Түрлі мәдени іс-шараларға, қоғамдық жұмыстарға да белсене қатысады. Ол – мейіргер ғана емес, отбасында төрт бала тәрбиелеп өсірген ардақты ана, сүйікті жар.
Айнұр БАТТАЛОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
