Сейсенбі күні Қызылорда қаласындағы «Достық үйінде» облыстық прокуратураның ұйымдастыруымен мемлекеттік айыптаушылар форумы өтті. Оған Құқық қорғау органдары академиясының ректоры мен профессорлары, облыстық сот төрағасы мен судьялары, прокуратураның жас мамандары мен мемлекеттік айыптаушылар қатысты.
Облыс прокуроры Ризабек Ожаров қылмыстық істерді қарап, әділ үкім шығаруда мемлекеттік айыптаушының ролі ерекше екенін айтты. Ол үшін айыптауды қолдаудың сапасын арттыру, жүйелі тәсіл қалыптастыру және қызметкерлердің кәсіби дағдысын үнемі жетілдіріп отыру қажет.
Құқық қорғау органдары академиясының ректоры Нұрғалым Әбдіров кіріспе сөз сөйлесе, облыстық прокуратураның мемлекеттік айыптауды қолдау және апелляциялық сатыға қатысу басқармасының аға прокуроры Бақай Махамбетжанов алқабилердің қатысуымен қаралатын қылмыстық істер бойынша мемлекеттік айыптауды қолдау ерекшеліктеріне, облыстық қылмыстық істер жөніндегі мамандандырылған ауданаралық соттың судьясы Асыл Ізтілеуова мемлекеттік айыптауды қолдау кезінде назар аударатын негізгі аспектілерге тоқталды. Құқық қорғау органдары академиясының профессоры Динара Найманова мемлекеттік айыптауды қолдаудың тактикалық тәсілдерін тарқатып, сендіру дағдыларын дамыту тренингін өтті.
Жиынның басты мақсаты – мемлекеттік айыптауды қолдау барысында туындайтын өзекті мәселелерді талқылау, тәжірибе алмасу және процесті одан әрі жетілдіру жөнінде ортақ шешімдер қабылдау. Іс-шара барысында екі негізгі бағыт сөз болды. Оның біріншісі – Мемле кет басшысының 2024 жылғы Жолдауындағы тапсырмасынан туындайтын алқабилердің қатысуымен қаралатын істердің артуы. Қазіргі күні республика бойынша да, облыс көлемінде де мұндай істер саны өсіп отыр. Форумға қатысушылар сот процесін оңтайландыру және алқабилер институтының тиімділігін арттыру жөнінде өзара пікір алмасып, ұсыныстар жасады.
Екінші кезекте прокурорлардың кәсіби даярлығы мәселесі қаралды. Мемлекеттік айыптаушының қоғам алдындағы жауапкершілігі зор. Олар заңгерлік біліммен қатар, шеберлік, этикалық нормалар, сендіру дағдылары, психологиялық тұрақтылық және стандартты емес жағдайларда дұрыс шешім қабылдау қабілеттерін жетік меңгерген болуы тиіс. Спикерлер жас мамандарды кешенді түрде даярлаудың маңызын атап өтті.
Жиын қорытындысында қатысушылар өзара пікір алмасып, мемлекеттік айыптауды қолдау процесін жетілдіруге бағытталған ортақ тұжырымға келді.
Назерке САНИЯЗОВА,
«Сыр бойы»
