Мемлекеттік қызметкер – мемлекеттік органда белгіленген тәртіппен ақы төленетін қызметті иеленген және мемлекеттің міндеттері мен қызметін іске асыру мақсатында қызметтік өкілеттігін жүзеге асыратын Қазақстан Республикасының азаматы. Мемлекеттік қызметшілер екі түрге бөлінеді: саяси және әкімшілік қызметкерлер.
Олардың әдебі мен мінез-құлқы мәселелеріне көбірек көңіл бөлінеді. Себебі мемлекеттік қызметші имиджінің тұтастығы жоғары кәсіби және жеке құзыреттер, моральдық-адамгершілік қасиеттер мен әдептілік мінез-құлық көріністеріне негізделген.
Мемлекеттік қызмет атқару бұл қоғам мен мемлекет тарапынан ерекше сенім білдіру болып табылады.
Мемлекеттік қызметкер – адал, әділ, қарапайым, жалпы қабылданған моральдық-әдептілік нормаларын сақтап, азаматтармен және әріптестерімен қарым-қатынаста сыпайылық пен әдептілік танытуы керек.
2016 жылдың 1 қаңтарынан бастап қолданысқа енген «Қазақстан Республикасы мемлекеттік қызметшілердің әдептілік нормаларын және мінез-құлық қағидаларын одан әрі жетілдіру жөніндегі шаралар туралы» Қазақстан Республикасы Президентінің 2015 жылғы 29 желтоқсандағы №153 Жарлығымен бекітілген Қазақстан Республикасы мемлекеттік қызметшілерінің Әдеп кодексі (Мемлекеттік қызметшілердің қызметтік әдеп қағидалары) осы міндетті іске асыру қорытындысы болды.
Осыған байланысты, қызмет этикасының жаңа ережелеріне сәйкес мемлекеттік қызметшілер қызметтен тыс уақытта жалпы қабылданған моральдық-этикалық нормаларды ұстануға, қоғамға жат мінез-құлық жағдайларына, оның ішінде қоғамдық орындарда адамның қадір-қасиетін және қоғамдық имандылықты қорлайтын мас күйінде болуына жол бермеуге, қарапайымдылық танытуға, тиісті қызметтер алу кезінде өзінің лауазымдық жағдайын баса көрсетпеуге және пайдаланбауға, өз тарапынан Қазақстан Республикасы заңнамасының талаптарын бұзуға жол бермеуге тиіс., және басқа азаматтарды құқыққа қарсы, қоғамға қарсы іс-әрекеттер жасауға тартпауға міндетті.
Мемлекеттік органдар жүйесінде мемлекеттік қызметке алғаш кірген жас мамандарды тәрбиелеуге ерекше мән беріледі. Олардың тиісті моральдық-адамгершілік келбетін қалыптастыру жөніндегі жұмыс ерекше назар аударуды және формальды көзқарасқа жол бермеуді талап етеді.
Осылайша, жас мамандарға мемлекеттік қызметте жұмыс істеген алғашқы күннен бастап азаматтар мен жұмыс бойынша әріптестермен қарым-қатынаста сыпайылық, әдептілік, қарапайымдылық, тілдік мінез-құлық мәдениетін сақтау қажеттігіне сенім артады.
Әдеп кодексі жалпы қабылданған мінез-құлық нормаларының басқа да тараптарын қамтиды. Мысалы, кодексте мемлекеттік қызметшінің қызметтік міндеттерін атқару кезінде сыртқы түрі мемлекеттік аппараттың беделін нығайтуға ықпал етуі, ресми, ұстамдылық пен ұқыптылықпен ерекшеленетін жалпы қабылданған іскерлік стилге сәйкес келуі тиіс екендігі көзделген.
Жеңісгүл Құрманбекова,
Қызылорда облысының кәмелетке
толмағандардың істері жөніндегі
мамандандырылған ауданаралық
сотының бас маманы
>>> Біздің Facebook, Instagram парақшаларымыз бен Telegram каналымызға жазылыңыз! <<<
