Заманауи талаптарға сәйкес мемлекеттік жобалар мен бағдарламаларды жүзеге асыру үшін мемлекет тарапынан бөлінетін қаражатты ұтымды әрі тиімді пайдаланудың өзектілігі артып келеді. Қазір әлемде жобалық басқару мемлекеттік реттеудің тиімділігін арттырудың негізгі құралдарының бірі болып табылуда. Себебі, жобалық басқару дегеніміз – қойылған мақсаттар мен ұсынылған нәтижелерге қол жеткізу үшін тапсырмаларды жүйелі орындау.
Жобалық басқаруда алға қойылған мақсатқа жету үшін айқындалған процесті міндетті бөліктерге бөлшектеп, әрбірі бойынша орындалу мерзімі мен оның құнын бақылау жұмыстары атқарылуы тиіс.
Осы орайда мемлекеттік органдарда жобалық басқаруды енгізудің басты мақсаты – мемлекеттік маңызы бар нысандардың құрылысына бөлінген қаржылардың тиімді жұмсалуы мен жұмыстың мерзімінде орындалуына бақылау жасау болып табылады.
Елбасы Жолдауында Үшінші жаңғырту аясындағы 30 дамыған елдің қатарына қосылу үшін тұрақты даму мен экономиканың өсу деңгейін қамтамасыз ететін ел дамуының негізгі басымдықтарын айқындап берген.
Осыған байланысты, мемлекеттік органдарда басқарудың дәстүрлі тетігімен қатар аталған бағыттарда тәуекелдер мен өзгерістерді басқарудың айрықша құралы ретінде жобалық басқару жүйесі енгізілді.
Бүгінгі күні елімізде жобалық басқаруды ендіру аясында басым бағыттар мен нысаналы индикаторлар бекітілген. Орталық деңгейде жобалық басқару аясында – 12, экономика бағыттары бойынша 21 жоба жүзеге асырылуда.
Аймақта жобалық басқаруды ендіру орталық және өңірлік секілді екі бағытта жүргізіледі.
Орталық деңгейде, аймақтың ерекшелігі мен басымдықтарын ескере отырып, облысымыз орталық мемлекеттік органдардың сегіз бағыты бойынша 10 жобаға қатысуда.
Мәселен, инвестицияларды тарту аясында облыс аумағында 32 жобаның жүзеге асырылуы жоспарланған (ағымдағы жылы 24 жобаны іске қосу және 8 жоба құрылысының басталуы). Жыл басынан бері жалпы құны 2,6 млрд теңге болатын 4 жоба жүзеге асырылды, жылдың аяғына дейін 32,7 млрд теңге сомасына тағы 20 жобаны жүзеге асыру жоспарланып отыр, бұл өңірдің қосымша даму көздерін қамтамасыз етеді.
Базалық индустрияландыру аясында шыны және цемент зауыттарының, «Шалқия» кен орнында тау-кен байыту комбинатының және жалпы құны 396,2 млрд теңге болатын кальцийлендірілген сода өндіру зауытының құрылысы бойынша жұмыстар жүргізілуде. Аталған нысандарда бүгінгі күні құрылыс жұмыстары белсенді жүргізілуде.
Денсаулық сақтау саласында МӘМС-ті енгізу, бәсекелестік пен жеке медицинаны дамыту, медициналық туризмді дамыту және импортты алмастыру, дәрілік заттар нарығын дамыту, денсаулық сақтаудың бірыңғай ақпараттық кеңістігін құру және негізгі аурулардың ауыртпалығын азайту арқылы денсаулық сақтау тиімділігін арттыру бойынша жұмыстар қарастырылған.
Еңбек нарығының инфрақұрылымын жаңғырту және еңбек ұтқырлығын дамыту бойынша еңбек ресурстарын жоспарлау және болжау, жаңа экономика үшін кадрларды даярлау және қайта даярлау, еңбек ағынын басқару және өнімді жұмыспен қамту мақсатындағы жұмыстар жүргізілуде.
Өңірлік деңгейде Белгород облысының (РФ) тәжірибесі негізінде жобалық басқаруды ендіру бойынша жұмыстар жалғасуда.
Жергілікті атқарушы органдардың жобалары бастамашылық, бюджеттік инвестициялық, мемлекеттік-жекеменшік әріптестік аясындағы және «Байқоңыр» ӘК» ҰК» АҚ-ның жобалары және экономиканы цифрландыру бастамаларын барынша көздейді.
Бүгінде «Жобалық кеңсе» ақпараттық жүйесінде 58 жобаның мониторингі жүргізілуде.
Болашақта жобалық басқару тәсілі мемлекеттік басқару жүйесіне түбегейлі өзгерістер енгізу алғышарттарын тудыра отырып, мемлекеттік-бағдарламаларды, ірі инвестициялық жобаларды тиімді басқаруға мүмкіндік беретін даму құралдарының біріне айналуы тиіс.
Б.ЖҮНІСОВА,
облыстық экономика және бюджеттік жоспарлау басқармасының бас маманы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
