Тәуелсіздік мерекесі қарсаңында облыстық ардагерлер кеңесінің ұйымдастыруымен «Талсуат» ардагерлер үйінде қарттар, мүмкіндігі шектеулі жандар және қыз-келіншектер арасында үстел теннисінен сайыс өтті.
Шараны облыстық ардагерлер кеңесінің төрағасы С.Дүйсенбаев ашып, қатысушыларды ел тәуелсіздігі мерекесімен құттықтады. Сонымен қатар, қоғамда салауатты өмір салтын қалыптастыру және аға ұрпақ өкілдері мен жастар арасындағы сабақтастықты нығайту бағытында ұйымдастырылып отырған шараның дәстүрлі түрде жалғасып келе жатқанын атап өтті.
Спорттық бәсекеге 30-дан астам адам қатысты. Үстел үстінде қаңбақтай ұшқан теннис шарын мүлт жібермей қағып, іле-шала жауап ұпай салып жатқан ойыншыларды мүмкіндігі шектеулі деп ешкім ойламайды. Тартысты сәтте тіпті шалт қимылдап, ширыға түскендері де байқалады. Екі сағатқа ұласқан сайыста ерекше қабілетімен көзге түскен ойыншыларға жанкүйерлердің қошеметі бөлек. Үздік ойын көрсетіп, жеңіске ұмтылған жандардың жүзінен үміт ұшқынын аңдадық. Бұл олардың өмір сынағына дес бермеген, келешекке деген ұмтылысы мен жігерінің көрінісі болса керек.
Ойын қорытындысымен, ардагерлер, жастар және қыз-келіншектер арасында топ жарған М.Тұрмаханова, Б.Клунов, М.Ағыбаев жүлделі орын иеленіп, арнайы дипломдармен марапатталды. Жалпы қатысушылардың барлығына ынталандыру сыйлықтары табысталды. Сайысқа облыстық дене шынықтыру және спорт басқармасының мамандары төрелік етті.
Ғазиза ӘБІЛДА.
>>> Біздің Facebook, Instagram парақшаларымыз бен Telegram каналымызға жазылыңыз! <<<
