Өткен жылдың қараша айында «Нұр Отан» партиясының Саяси кеңес отырысында Мемлекет басшысы, партия Төрағасы Нұрсұлтан Назарбаев ұйым жұмысын жаңғыртуды тапсырған болатын. Бұл ретте БПҰ жұмысына баса мән берілді.
Осыған сәйкес, нұротандықтар алдымен Қарағанды, Ақтөбе, Павлодар және Шымкент қалаларында бастауыш партия ұйымдарының аймақтық форумын өткізді. Соның нәтижесінде бастауыш партия ұйымдарының жұмысын жандандыру Тұжырымдамасы дайындалып, бұл құжат 14-15 қараша күндері Астана қаласында барлық аймақтардың қатысуымен өткен республикалық форумда бекітілді.
Осы орайда қызылордалық нұротандықтар бас қосып, тұжырымдамада көрсетілген міндеттерді жан-жақты талқылап, тәжірибе бөлісті. Семинар отырысына партияның аумақтық филиал өкілдері, бастауыш партия ұйымдарының жетекшілері қатысты.
«Нұр Отан» партиясының облыстың филиалы төрағасының бірінші орынбасары Ибадулла Құттықожаев халықтық қолдауға ие болған Елбасының бастамаларын насихаттауда барлық құрылымдық бөлімшелер мен белсенділер жұмылдырылып отырғанын айтты.
– Бүгінде партиялық жаңғырудың нақты жоспары бойынша көптеген жұмыстар қолға алынды. Оның ішінде еліміздің әлеуметтік, экономикалық, саяси және рухани жаңғыруына жан-жақты қолдау көрсетуге бағытталған 22-ден астам партиялық жоба жүзеге асуда. Олардың қатарында жылына 8-16 жас аралығындағы 150 мың баланы тегін оқытуды көздеген «Балаларға арналған тегін IT сыныптар», балалардың дұрыс тамақтанып, салауатты болуы үшін мектеп асханаларының жұмысында ас мәзірінен бастап, оның құрамы, қызмет сапасы, тазалық сияқты негізгі бағыттарды қамтитын «Мектеп асханалары», «Мектептегі футбол алаңдарын қайта құру» партиялық жобалары жүзеге асуда. Ауылды жерлерде ағылшын тілін үйрететін клубтар ашып, осы клубтарға ерікті ретінде ағылшын тілінде сөйлейтін мамандарды тартып, кезең-кезеңімен ауыл жастарына ағылшын тілін үйретуді қолға алып жатырмыз. Бұл жобалардың барлығы халықты қолдауға бағытталып отыр, – деді И.Құттықожаев.
Семинарда бастауыш партия ұйымдарының қызметін жетілдіру жұмыстары туралы «Тұран» филиалы төрағасының бірінші орынбасары Е.Назаров, ал партияның барлық қызметін цифрландыруға бағытталған «Цифрлық партия» жобасы туралы «Теміржол» филиалы төрағасының бірінші орынбасары Б.Танбаева және бастауыш партия ұйымдарының жұмысын жетілдіру жолдары бойынша «Ынтымақ» бастауыш партия ұйымының төрағасы Т.Оразбек баяндама жасады.
Сондай-ақ, партияның барлық қызметін цифрландыруға бағытталған «Цифрлық партия» жобасы, партия қатарына қабылдау рәсімін жетілдіру, мүшелердің өзекті деректер базасын қалыптастыру және есепке алу, мансаптық өсуі секілді мәселелер ортаға салынып, бастауыш ұйымдардың алдында тұрған жұмыстарды пысықтады.
Шынар БЕКБАН.
>>> Біздің Facebook, Instagram парақшаларымыз бен Telegram каналымызға жазылыңыз! <<<
