Ішкі істер органдарында орын алған кадрлық өзгеріске байланысты облыс активі өтті. Жиынға арнайы келген ҚР Ішкі істер министрінің бірінші орынбасары Марат Қожаев Қызылорда облыстық полиция департаментінің бастығы болып тағайындалған Мұхтар Қожабаевты таныстырды.
Жиында облыстық полиция департаменті ардагерлер кеңесінің төрағасы Серікбол Тұңғышбаев жаңа басшыға қолдау білдіріп, табыс тіледі.
Актив отырысында облыс әкімі Нұрлыбек Нәлібаев Сыр еліне арнайы келген Марат Қожаевқа алғыс білдіріп, ішкі істер органдары мемлекеттік биліктің қоғамда құқық тәртібін, азаматтардың қауіпсіздігін қамтамасыз ететін маңызды құрылым екенін атап өтіп, Мұхтар Аманқұлұлына жаңа қызметте сәттілік тіледі.
– Асқан жауапкершілікті талап ететін күрделі салада Мұхтар Аманқұлұлының білімі мен білігі, жинақтаған мол тәжірибесі жетеді деп санаймыз және бұл кадрлық шешімді толық қолдаймыз.
Мұхтар Аманқұлұлы өңірдегі қоғамдық тәртіпті сақтау мен қауіпсіздікті қамтамасыз етуде, мемлекеттің мүдделерін құқыққа қарсы қолсұғушылықтан қорғауда және аймағымыздың дамуына өз тарапынан үлес қосады деп сенім артамыз, – деді облыс әкімі.
Құқық бұзушылықтардың алдын алу мақсатында 2020-2022 жылдар аралығында полиция органдарының материалдық-техникалық базасын жақсартуға облыстық бюджеттен 5 млрд теңгеден аса қаражат бөлінді.
Биыл полиция департаменті қызметкерлеріне 92 қызметтік автокөлік табысталды. Сондай-ақ, сақшылардың қызмет барысын оңтайлы етуге мүмкіндік беретін соңғы үлгідегі бейнебақылау камералары мен жылдамдық режимін бақылау стационарлық жүйелері орнатылды.
Кешенді шаралардың нәтижесінде биылғы жылдың 6 айында жалпы тіркелген қылмыстық құқық бұзушылықтар 5% азайған.
Мұхтар Қожабаев 1968 жылы 17 тамызда дүниеге келген. Білімі жоғары. 1987-1989 жылдары Қарулы күштер қатарында қызмет атқарды.
1992-1993 жылдары – ІІБ МАИ жол-патрульдік қызметінің жеке батальонының жол-патрульдік полициясының инспекторы, 1993-1997 жылдары – БӨП ЖПҚ аға инспекторы, Келес ауданы ІІБ МАИ бөлімшесінің және Сарыағаш ауданы ІІБ мемлекеттік автоинспекторы, 1997-1999 жылдары – Сарыағаш ауданы ІІБ Жол полициясы бөлімшесінің бастығы, полиция бөлімінің бастығы, 1999-2004 жылдары – Мақтарал ауданы ІІ Бекінші полиция бөлімінің ӘПЖН бастығы болған.
2004-2006 жылдары – ІІМ Жол полициясы департаменті мемлекеттік автомобиль инспекциясы басқармасының тіркеу-емтихан жұмысының бас маманы, 2007-2008 жылдары – Оңтүстік Қазақстан облысы ІІД басқарма бастығының орынбасары, патрульдік қызмет бөлімінің бастығы, Жол полициясы басқармасының бастығы, 2009 жылы наурыздан қарашаға дейін – Шымкент қаласының Ішкі істер басқармасы бастығының орынбасары, 2009-2015 жылдары – Оңтүстік Қазақстан облысы Ішкі істер департаменті тылдық қамтамасыз ету басқармасының бастығы, 2015-2018 жылдары – Оңтүстік Қазақстан облысының Ішкі істер департаменті бастығының орынбасары, 2018 жылдың шілде-қараша айларында – Түркістан облысының Ішкі істер департаменті бастығының орынбасары қызметін атқарған.
2018 жылдың қараша айынан Түркістан облысы Полиция департаменті бастығының орынбасары қызметін абыроймен атқарып келді.
Облыс әкімінің баспасөз қызметі
>>> Біздің Facebook, Instagram парақшаларымыз бен Telegram каналымызға жазылыңыз! <<<
