Өткен жылы Сыр өңірінде дүниеге келген қыз балаларға Нәйла, Інжу, Раяна, Айару деген есімдер жиі қойылса, ұлдарда Мансұр, Айсұлтан, Нұрасыл деген есімдер көп қайталаныпты. 2018 жылы облыста 19,1 мың сәби дүние есігін ашса, оның ішінде 179 жұп егіз және екі үшем тіркелген.
Бұл – бәрін білетін статистика деректері. Дәлірек айтқанда, облыстық статистика департаментінің 2018 жылы атқарған жұмыстарының қорытындысы мен алдағы тұрған міндеттер туралы өңірлік коммуникациялар қызметінде өткен брифингте департамент басшысы Мәриям Баекеева осындай мәліметтер келтірді.
Ағымдағы жылдың 1 ақпанына аймақтағы халық саны 795,3 мың адамды құраса, оның ішінде қала тұрғындары 44,3% , ал ауыл тұрғындары 55,7% болды. Еңбекке қабілетті жастағы халық саны – 446,1 мың адам. Облыс халқының болжамды өмірінің орташа ұзақтығы 1995 жылмен салыстырғанда 5,2 жылға ұзарып, 72,6 жасты құрап отыр.
2019 жылдың қаңтар-ақпанында облыс экономикасының негізін құрайтын өнеркәсіп өндірісімен 355-тен аса ірі кәсіпорын айналысып, 149,8 млрд теңгенің өнімін өндірді. Өңдеу өнеркәсібінде өткен жылдың сәйкес кезеңімен салыстырғанда 7,2 процентке артық өнім өндіріліп, оның құны 19,8 млрд теңгені құрады. Сол секілді негізгі капиталға салынған инвестиция көлемі де 2,4 есе өсіп 56 млрд теңгеге жетті. 2019 жылдың қаңтар-ақпан айындағы жағдай бойынша ауыл шаруашылығы өнімдерінің жалпы көлемі 6,7 млрд теңгені құрап, өткен жылдың сәйкес кезеңінен 0,7% жоғарылады.
2018 жылдың қаңтар-желтоқсан аралығында Қызылорда облысының ЕАЭО елдерімен өзара саудасы 75,7 млн долларды құрады. Бұл 2017 жыл көрсеткішінен 1,3 процентке көп. Ал биылғы жылдың алғашқы айының көрсеткіші 2018 жылдың сәйкес кезеңімен салыстырғанда 4,5 есеге артып отыр. 2018 жылы экспорт 25,5 млн долларды құраса (1,5% азайды), импорт 50,2 млн доллар болды (2,7% көбейді). 2019 жылдың қаңтар-ақпанындағы бөлшек сауда айналымы 38,9 млрд теңге, сәйкес кезеңмен салыстырғанда 100,3%. Осы жылғы 1 наурыздағы мәлімет бойынша облыста 51350 шағын және орта кәсіпкерлік субьектілері тіркеліп, 1,6% өсті. Жұмыс істеп тұрған ШОБ субъектілер саны 13,8% артты. Жыл басынан бері азық-түлік тауарлары бағасы 2,4% (ҚР-2,8%), азық-түлік емес тауарлар бағасы 0,8% (ҚР-0,6%) өсіп, ақылы қызмет 2 % (ҚР-1,5%) төмендеген.
Департамент басшысы брифинг соңында саланың ашықтығын қамтамасыз ету және ақпараттық-имидждік саясатты қолдау мақсатында 2018 жылдың 19 қазанынан бастап, statgov.kz ресми Youtube арнасы іске қосылғандығын айтып өтті.
Ыдырыс ТӘЖІҰЛЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
