Мемлекет басшысы Қасым-Жомарт Тоқаевтың бастамасымен елімізде бастау алған ауыл, кент және ауылдық округ әкімдерінің тікелей сайлауына саяси партиялар да өз үміткерлерін ұсынуда.
Атап өтейік, 25 шілдеде еліміз бойынша бір мезгілде 700-ден астам ауыл әкімін сайлау жоспарланса, Сыр өңіріндегі 132 ауылдық деңгейдегі әкімнің 40-ы алғаш рет тікелей сайлауда таңдалмақ.
Өткен жылы жалпыұлттық жоспар шеңберінде сайлауға қатысты «ҚР Сайлау туралы» Конституциялық заңға, «ҚР Жергілікті мемлекеттік басқару және өзін-өзі басқару туралы», «Мемлекеттік қызмет туралы» және «Саяси партиялар туралы» заңдарға өзгерістер мен толықтырулар енгізілген болатын. Заңнамалардың жаңашылдығы – тең және төте сайлау құқығы негізінде жасырын дауыс беру арқылы ауыл әкімдерін сайлау. Бұрын жанама түрде сайланған ауыл әкімдерінің өкілеттігі тоқтап, ендігі әкімдер тікелей сайлау арқылы таңдалады. Бұл – еліміздің саяси дамуындағы айтулы оқиға, жаңа кезең. Ауыл тұрғындары өз әкімдерін тікелей сайлап, сол арқылы өздерінің саяси құқықтарын кең ауқымда жүзеге асырудың тағы бір қосымша мүмкіндігіне ие болады. Үміткерлерді саяси партиялар арқылы ұсыну немесе кандидаттың өзін-өзі ұсынуға мүмкіндігі бар.
Сайлау заңнамасының жаңа талаптарын қалт жібермеген «Nur Otan» партиясы ұсынылатын үміткерлерін іріктеп, додаға қосуға белсене кірісті. Облыстық филиалға қарасты 7 аудандық филиалда алдымен 177 бастауыш партия ұйымының жиналыстары мен Саяси кеңес Бюро отырыстары, кезектен тыс конференциялар өткізілді.
Конференцияларға аудандық партия филиалдарының Саяси кеңестері мен аудандық мәслихаттағы депутаттық фракциялары мүшелері, бастауыш партия ұйымдарынан сайланған делегаттар мен «Jas Otan» жастар қанатының өкілдері қатысты. Ауылдық округ әкімдерінің сайлауына партия атынан ұсынылатын кандидаттар таныстырылып, оларды аудандық сайлау комиссияларына тіркеуге ұсынды.
Жетекші партия өкілдері 25 шілде күні өтетін ауыл әкімдерінің тең және төте сайлауында өз үміткерін бәйгеге қоспақшы. Олардың қатарында 35 жасқа дейінгі жастар мен әйелдер де бар.
Ауыл әкімдері халықпен тікелей қарым-қатынаста болған соң, бұл сайлау билік пен халық арасындағы, өзара байланысты күшейтуге, әкімдердің тұрғындар алдындағы жауапкершілігін арттыруға үлкен серпін береді дейді жетекші партия өкілдері.
