Облыс бюджеті кезекті рет нақтыланды

146

0

Кеше облыс әкімі Нұрлыбек Нәлібаевтың қатысуымен облыстық мәслихаттың XIV сессиясы өтті. Сессияға облыс әкiмiнiң орынбасарлары, құқық қорғау органдарының, облыстық басқармалар мен аумақтық инспекциялардың басшылары қатысты. Аудан, қала әкімдері, мәслихат төрағалары және активі бейнебайланыс жүйесі арқылы қосылды.

Күн тәртібінде бес мәселе қаралды. Біріншісі – «2024-2026 жылдарға арналған облыстық бюджет туралы» облыстық мәслихаттың 2023 жылғы 13 желтоқсандағы № 63 шешіміне өзгерістер енгізу. Сонымен қатар облыс әкімдігі жанындағы бірқатар комиссиялар мен сараптамалық, өңірлік үйлестіру кеңестерінің құрамына өзгеріс енгізу және бекіту мәселелері талқыланды.

Аймақ басшысы негізгі әлеуметтік-экономикалық көрсеткіштерге тоқталып, 2024 жылға арналған облыстық бюджетті кезекті нақтылауға ұсынды.

– 2023 жылдың қорытындысымен және осы жылдың басынан бері аймақтың әлеуметтік-экономикалық дамуында оң тенденция сақталуда. Өңір өңдеу өнеркәсібінде былтырғы 11-орыннан биыл 4-орынға көтерілді, өткен 4 айда көшбасшы позициясын сақтадық.

Осы нақтылауда «Шығармашылық академиясының» құрылысына 1 млрд теңге, Сырдария өзенінің сол жағалауына салынатын тарихи-мәдени мұра орталығына 875,8 млн теңге, «Оқушылар сарайына» 55,1 млн теңге бағытталды. Сонымен қатар Қожа Ахмет Яссауи көшесін қайта жаңғырту жұмыстарына 1 млрд теңге, әуежайға кіреберіс автомобиль жолын қайта жаңғыртуға 1 млрд теңге жоспарланған.

ТЭЦ-тің газтурбинасы мен турбогенераторын жөндеуге 886,8 млн теңге, қала аумағында 2005 жылдан бері жұмыс жасап тұрған АБМК-ларды жөндеуге 695,7 млн теңге қаржы қаралуда. Индустрия және инфрақұрылымдық даму министрлігі жүргізген жұмыстар нәтижесінде, биыл әлеуметтік кредиттік тұрғын үй салу үшін облигациялық қарыздар есебінен 5,4 млрд теңгеге мемлекеттік бағалы қағаздар шығару келісілді. Бұл қаржы есебінен 904 пәтерлік 16 тұрғын үй салынады. Халықтың әлеуметтік осал топтары үшін коммуналдық тұрғын үй қорынан 1400 пәтер сатып алуға 20,7 млрд теңгеге мемлекеттік бағалы қағаздар шығару жоспарлануда. Екі жыл бұрын облыс бюджеті 387 млрд теңге болса, осы жылдың басында 650 млрд теңге көлемінде бекітілді.

Құрметті депутаттар! Сіздердің қолдауларыңыз бен бірлесіп жүргізілген жұмыстардың арқасында бүгінгі күні облыс бюджеті 678 млрд теңгеге жетті, – деді Нұрлыбек Нәлібаев.

Облыс әкімінің айтуынша, биыл Сыр диқандары 187,5 мың гектар алқапқа ауыл шаруашылығы дақылдарын егуде, оның 81,1 мың гектары – күріш. Су үнемдеу технологияларын 4,2 мың гектарға қолдану көзделсе, 2028 жылға қарай бұл әдіспен егін егу 24,2 мың гектарға жетеді деген жоспар бар.

Экономиканы индустрияландыру аясында 16 жоба іске асырылмақ. Оның біреуі, яғни Қазалы ауданындағы «Жанкент Агро» серіктестігінің күріш ақтау зауыты іске қосылды.

Жергілікті жол инфрақұрылымын дамытуға қаржы бөлініп, 266 шақырым автомобиль жолдары, көпір өткелдері және көшелер жөнделеді. Қызылорда қаласындағы Жаппасбай батыр көшесі 4 жолақты болып кеңейтіледі. Яссауи көшесін қайта жаңғырту жұмыстары қарқынды жүруде. Жанқожа батыр көшесіндегі теміржол асты көпірінің құрылыс-монтаждау жұмыстары басталды.

–    Мемлекет басшысының қолдауымен Қызылорда қаласының тұрғын үйлерін ыстық сумен қамтуға Үкімет резервінен 11 млрд теңге бөлінді. Биыл қаладағы 187 үй орталықтандырылған ыстық сумен қамтылады. Жылу желілерін жаңғырту жұмыстары да кезең-кезеңімен атқарылуда. Осы жылы 7 млрд теңгеге 9,5 шақырым жылу желілері қайта жаңғыртылуда. Бұдан бөлек, 11 млрд теңгеге 741 шақырым электр желілері мен 127 қосалқы станция күрделі жөндеуден өтуде.

Наурыз айында Шиелі ауданында 4 ауыл (Бестам, Тәжібаев, Алмалы, Ақтоған) газға қосылса, жыл соңына дейін аймақтағы тағы 8 елді мекенді «көгілдір отынмен» қамтып, газдандыру көрсеткішін 78 пайызға жеткізу көзделуде. Әлеуметтік салада да ауқымды жұмыстар атқарылуда. Көптеген әлеуметтік нысандардың құрылысы жүргізілуде, – деді аймақ басшысы.

Сессияға дейінгі тұрақты комиссиялардың бірлескен отырысында күн тәртібіндегі алғашқы мәселеге бойынша депутаттар сауалына байланысты облыстық экономика және қаржы басқармасының басшысы Қамбарбек Мүбәраков хабарлама жасады.

–    Біраз депутаттардан сауал түсті, соған жауап берсем. Депутат Балжан Шәменова  қалалық көпбейінді ауруханаға лапароскопия алуға, облыстық көпбейінді аурухананың кәріз жүйелеріне күрделі жөндеу  жүргізуге, жөндеу жұмысы басталған облыстық жұқпалы аурулар ауруханасына қаржы бөлуді сұраған болатын. Қалалық көпбейінді ауруханаға лапароскопия алу бойынша қаржына келесі сессияға қалдырып отырмыз. Ал облыстық көпбейінді ауруханаға байланысты 394 млн теңге сұралған болатын, бірақ біз жұмысты бастау үшін 100 млн теңге қарастырып отырмыз. Жұқпалы аурулар ауруханасының күрделі жөндеуіне басында қаржы берілді, қалғаны мүмкіншілікке қарай қаралатын болады. Депутат Мақсұт Нәлібаев сол жағалаудағы музей, облыс бойынша 10 әлеуметтік нысанның қазандықтарын газға ауыстыру, балабақшадағы аз қамтылған отбасылардың балаларын тегін ыстық тамақпен қамтамасыз етуге байланысты сауалын жолдады. Нұридин Әмитовтің Қазалы ауданы бойынша 6 дәрігерлік амбулаторияны газға ауыстыру, Сырдария ауданы бойынша ескі бұрынғы туберкулезге қарсы диспансер ғимаратына паллиативті орталық ашу, сирек кездесетін дәрілер бойынша 381 науқасты жыл соңына дейін дәрі-дәрмекпен жүйелі түрде қамтамасыз ету, қалалық орталық емхананың 2 ғимаратына 2 дизельдік генератор қоюға байланысты сауалына да мүмкіндігіне қарай қаржы қаралды, – деп өзге де депутаттардың көтерген мәселелеріне қатысты жеке-жеке жауап берді.

Сондай-ақ басқарма басшысы бюджетті жоспарлаудағы өзекті мәселелер мен оның орындалу маңыздылығына тоқталды.

Тұрақты комиссиялардың бірлескен отырысында күн тәртібіндегі өзге де мәселелер талқыланды.

Айнұр БАТТАЛОВА,

«Сыр бойы»

 


>>> Біздің Facebook, Instagram парақшаларымыз бен Telegram каналымызға жазылыңыз! <<<