Шымкентте Қызылорда, Түркістан, Жамбыл, Алматы облыстары және Шымкент қаласы әкімдік өкілдерінің қатысуымен өңіраралық инвестициялық форум өтті. Қызылорда облысының делегациясын облыс әкімінің бірінші орынбасары Серік Қожаниязов бастап барды.
Басты пленарлық мәжілісті Шымкент қаласының әкімі Мұрат Әйтенов ашты. Форумға Сыртқы істер министрінің орынбасары Алмас Айдаров, Индустрия және инфрақұрылымдық даму вице-министрі Ілияс Оспанов, ҚР Өзбекстан Республикасындағы Төтенше және Өкілетті елшісі Бейбіт Атамқұлов, ҚР Қырғыз Республикасындағы Төтенше және Өкілетті елшісі Рәпіл Жошыбаев қатысып, сөз сөйледі.
Облыс әкімінің бірінші орынбасары С.Қожаниязов өңірдің экономикалық дамуы және инвестициялық мүмкіндіктері туралы баяндама жасады. Форумның іскерлік бағдарламасына сәйкес облыс әкімдігі Германияның «Medal Vervaltungs» фирмасымен Қызылорда қаласының индустриялық паркінде фиброцемент, құрғақ құрылыс қоспаларын және пенобетон блоктарын шығаратын зауыттар салу туралы және «BSD Company» фирмасымен шыны ыдыстар шығаратын зауыт құрылысы бойынша меморандумға қол қойды.
Сонымен қатар, Қызылордадағы «Орда Glass» шыны зауыты шымкенттік «Авангард» серіктестігімен шыны жеткізу туралы келісім-шартқа отырды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
