Қазақстан Республикасы Ақпарат және қоғамдық даму министрлігінің қаржылай қолдауымен, «Азаматтық бастамаларды қолдау» КЕАҚ-ның мемлекеттік грантының аясында «Ақ босаға» әйелдер қоғамдық бірлестігінің және облыстық Рухани жаңғыру орталығының ұйымдастыруымен «Берекелі отбасын қалыптастыру» тақырыбында семинар-тренинг өтті.
Семинар тренері – профессор, психология ғылымдарының PhD докторы, Психология ғылымдары халықаралық академиясының корреспондент-мүшесі Күлмаш Елшібаева, ал модераторы – жоба жетекшісі Зейнар Тажиева.
Шараға Қарағанды, Нұр-сұлтан қалалары мен Қызылорда облысынан 250-дей адам қатысты. Атап айтқанда, жас отбасылар, көпбалалы отбасылар, әлеуметтік педагогтар, психологтар, мұғалімдер сынды түрлі ортаның өкілдері ұлттық бірегейлігімізге тән шаңырақтың қадір-қасиетін арттыру бағытында отбасылық қарым-қатынасты дұрыс қалыптастыру мәселесіне назар аударды. Осы орайда педагогика саласының бірегей маманы, «Рухани жаңғыру» орталығының бөлім басшысы, педагогика ғылымдарының кандидаты, Қазақстанның еңбек сіңірген қайраткері Әлима Әбдіхалықованың пікірін білген едік:
– Қазақстанның Тұңғыш Президенті-Елбасы Нұрсұлтан Әбішұлы Назарбаевтың «Болашаққа бағдар: Рухани жаңғыру» бағдарламалық мақаласы түп-түгел ұлттық құндылықты сақтау және нығайтуға бағытталған. Мәселен, қазіргі жаһандану үдерісінде заманауи білім беру, заманауи қарым-қатынас құру мәселесі алға шықты. Осы орайда біз ұлттық кодымыз бен ұлттық бірегейлігімізге сай идеологиялық жұмысты қарқынды жүргізуіміз қажет. «Отан – отбасынан басталады» деген халық даналығын терең түсініп, отбасылық құндылығымызды сақтай отырып, ұрпақ тәрбиесінің заманға лайық үлгісін қалыптастыра білгеніміз жөн, – дейді ол.
Семинарда талқыланған тақырыпқа орай қазақ әдебиетінің көркем шығармаларындағы басты кейіпкерлер болмысын мысалға ала отырып, ұлттық тәрбиенің мықтылығына назар аударған филология ғылымдарының кандидаты, доцент, Қорқыт ата атындағы Қызылорда университетіндегі М.Шоқай атындағы әдеби бірлестіктің жетекшісі Айман Айтбаеваның пікірі көпшілікке ой салды.
Семинарда «Өмір – қайталанбайтын қысқа сәт» деген тақырыпта пікірталас болып, онда ата-ене мен келін арасындағы сыйластықтың сырын ашатын психологиялық жаттығулар жасалды. Сонымен бірге, Эриксон гипнозы, Эриксон метафорасы (жеңіл транс арқылы негативті ойлардан арылу) сияқты психологиялық әдістер пайдаланылды. Қатысушылар өз ойларын ортаға салып, тренердің тың әдістерінен тәжірибе алды. Сондай-ақ, шара соңында алғыстарын білдіріп, семинардың пайдасы мен оң әсері туралы пікір қалдырды.
Айта кетейік, семинарға қатысушыларға арнайы сертификаттар берілді.
Ғазиза Әбілда,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
