Қызылордада 2 күн бойына «QYZYLORDA CUP – 2019» би спорты бойынша ҚР би спорты федерациялары ассоциациясының құрметті президенті Қажымқан Мәсімовті еске алуға арналған Қазақстан Республикасының халықаралық турнирі өтті. Турнир аясында параби бойынша ел кубогі ұйымдастырылды.
Турнирді ҚР Мәдениет және спорт министрлігінің комитеті, облыстық дене шынықтыру басқармасы және спорт басқармасы, ҚР би спорты федерациялары ассоциациясы, облыстық би спорты федерациясы және «Орда» спорттық би клубы облыс, қала әкімдіктерінің қолдауымен өткізді.
«Қазгермұнай» компаниясы Қызылорда облысының би спорты федерациясына серіктес болды. Ерекше адамдарды оңалтуға көмек көрсету «Қазгермұнай БК» ЖШС-ның әрдайым назарында. Параби кубогін қолдау арқылы бишілерді жарқын өмірге шабыттандырып, ерік-жігерлерін жани түсті. Арбаға таңылғандарына қарамастан, қайсарлықтың үлгісін танытып, жан-жағындағыларға өмірді сүйе білуді үйретіп жүрген жандарды демеудің жөні бөлек. Компания жарыстың жүлдегерлері мен жеңімпаздарына арналған кубок, медаль сатып алуға және турнир өткізілетін орынды даярлауға демеушілік көрсетті.
Турнирге Қазақстан, Ресей, Қырғызстан, Өзбекстан және Түркіменстаннан 500-ден астам би дуэттері қатысты. Ашылу салтанатында облыс әкімінің орынбасары Р.Рүстемов спорттың осы түрін серік еткен барша қатысушыларға сәттілік тіледі. ҚР спорттық би федерациялары ассоциациясының президенті Қ.Байжанов Қ.Мәсімовтің арбадағы би өнерінің дамуына қосқан үлесі, спортшыларға көрсеткен қолдаулары туралы айтты.
Бұл жарыста спортшыларды мүгедектігіне байланысты 1 және 2 сыныпқа бөледі. Бишілер танго, вальс, самбо, румба және джайв билерінен сайысқа түсті. Жарысқа қатысушылардың сәнді костюмдеріне, жеңіске деген құлшынысына, сахнада өз-өздерін ұстауына көрермендер ерекше ықыласпен қол соқты. Өнерпаздардың әр қимылы, әуенді сезінуі олардың әрқайсысын жеңімпаз деп тануға жеткілікті болды. Арбаға таңылған жандардың паркетке шығуының өзі жеңіс емес пе?
Турнир өткен спорт кешенінде сол күндері қалыптасқан ерекше атмосфера қатысушыларға мүмкіндігі шектеулі екендіктерін ұмыттырып жібергендей. Олар би арқылы бойдағы күш-қуатын, өмірге құштарлығын көрсете білді.
Бізбен әңгімесінде Тараздан келген Н.Ахметова өз өмірінде бидің алатын орнын айтты. Бала шағынан би спортымен айналысқан ол қапыда болған апаттан аяғынан айырылғанымен, жігерін жасытпады. Қазір Қазақстанның 5 дүркін чемпионы, осы сайыстың да үздігі атанды.
– Паркетке шыққанда барлығын ұмытып, шын ынтаммен әуен мен биге берілемін, – дейді ол.
Жеңімпаздар қатарында жерлестеріміз Е.Дәрібаев пен Р.Смағұлова да бар.
«Қазгермұнай» компаниясы парабишілерге еліміздің кубогына қатысқандары үшін алғыс айтты. Күн сайын ерлік жасап жүрген, ағысқа қарсы жүзіп, ерік-жігерлерін мұқалтпаған, сөйтіп шеберліктерін дәлелдеген олар қандай құрметке де лайықты.
М.МЕРЕЙ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
