Қазақстанның Варшавадағы Елшілігі Польшадағы қазақстандық студенттің қайғылы қазасына қатысты тергеуді ерекше бақылауда ұстауда, деп хабарлайды ҚазАқпарат тілшісі.
«Польшаның құқық қорғау органдарының мәліметінше, жергілікті полиция кісі өлтірген күдіктіні және оның жолдасын – осы елдің азаматтарын ұстады. Біріншісіне кісі өлтірді деген айып тағылды. Ал оның досы тергеуге кедергі келтірді және көмек көрсетпеді деп айыпталуда. Күдіктінің аңшы екені анықталды және қазақстандық студенттер тұрған жаққа оқ атқан. Қазіргі уақытта тергеу шаралары жүргізілуде», – делінген ҚР Сыртқы істер министрлігі таратқан ресми ақпаратта.
Ведомствоның атап өтуінше, Қазақстан тарапы Польша билігіне барынша мұқият тергеу жүргізуді және барлық кінәлілерді жазалау туралы өтініш білдірген. Қазіргі уақытта дипломаттар құжаттарды рәсімдеп, марқұмның денесін отанына жіберу бойынша шаралар қабылдап жатыр.
«Қайтыс болған студенттің туыстары мен жақындары олардың сезімдері мен жеке өміріне қол сұқпау құқығын құрметтеуді, осы трагедия төңірегінде дүрліктірмеуді сұрайды», – деді министрліктен. Еске салайық, 2 қарашада Польшаның Ополе Любельское қаласында Қазақстанның 16 жастағы азаматы оқ жарақаты салдарынан қаза тапқан болатын.
>>> Біздің Facebook, Instagram парақшаларымыз бен Telegram каналымызға жазылыңыз! <<<
