Бүгін облыс әкімі Гүлшара Әбдіқалықова «Қала күні-2020» мерекесіне орай Қызылорда қаласындағы бірқатар нысандарға барды.
Қала күні мерекесінің салтанатты ашылуы жаңадан пайдалануға берілген «Денсаулық» саябағында өтті. Аймақ басшысы Гүлшара Әбдіқалықова қала тұрғындарын мерекемен құттықтап, жаңадан пайдалануға берілген саябақтың ел игілігіне қызмет ететініне сенім білдірді.
Мұнан кейін аймақ басшысы қайта жаңғыртудан өткен «Сыр ана» алаңының жұмысымен танысты. Абаттандыру жұмыстарын «Техоснастка – Ремсервис» ЖШС жүргізген. Алаңда жаяу жүргіншілер жолы, спорттық – ойын алаңы және 2 су бұрқақ орналастырылған.
Сонымен қатар, облыс әкімі Жаппасбай батыр көшесі бойындағы жаңа №282 мектеп-лицейінің ашылу салтанатына қатысты.
600 орындық білім ұясының құрлысы 2018 жылдың сәуір айында басталған. Ғимараттың ауқымы 43497 шаршы метрді құрайды. Бас мердігер – «Ария-Жаңа Астана» ЖШС. Аймақ басшысы Гүлшара Әбдіқалықова жаңадан пайдалануға берілген мектептің жұмысына сәттілік тілеп, ел мақтанышы болатын азаматтарды түлеп шығаратын білім ордасы болатынына сенім білдірді.
«Жаңадан бой көтерген мөлтек ауданнан жаңа мектепті пайдалануға бергелі тұрмыз. Өздеріңізге белгілі карантин талаптарына сәйкес қазіргі уақытта оқушылар қашықтықтан білім алуда. Дегенмен, бұл уақытша қиындықтар. Оқушыларымыз жайлы, жылы ғимаратта білім алу керек. Білім ұясының түлекшілері ел мақтанатын азаматтар болады деп сенемін. Жаңадан салынған мектеп ел игілігіне қызмет етсін», – деді Гүлшара Әбдіқалықова.
Мұнымен қоса, облыс әкімі «Дәрігерлер» аллеясының ашылу рәсіміне қатысты.«Дәрігерлер» аллеясы «Жұмыспен қамтудың Жол картасы» бағдарламасы аясында Н. Назарбаев даңғылын абаттандыру жобасы бойынша салынған. Шарада аймақ басшысы Гүлшара Әбдіқалықова мерекеге орай «Көп бейінді облыстық ауруханасы» ШЖҚ МКК-ның қабылдау бөлімшесінің кардиолог дәрігері Ғалымжан Қоразов пен «Көп бейінді облыстық ауруханасы» ШЖҚ МКК-ның реабилитация бөлімшесінің меңгерушісі, нейроинсульт орталығы жетекшісінің м.а., директордың емдеу ісі жөніндегі орынбасары Ғалия Абеноваға жаңа пәтер кілтін табыстады.
Сондай-ақ, «Қала күні-2020» мерекесіне орай мемлекет және қоғам қайраткері, соғыс және еңбек ардагері Ыдырыс Қалиевтің ескерткіш-мүсінін ашу рәсімі өтті.Шараға облыс әкімі Гүлшара Әбдіқалықова, Ыдырыс Қалиевтің жұбайы, туған-туыстары және қоғам қайраткерлері мен еңбек ардегерлері қатысты.Ыдырыс Қалиевтің ескерткіш-мүсінінің ашылу салтанатына орай Қазақстан Республикасының Мемлекеттік хатшысы Қырымбек Көшербаев Сыр жұртшылығына арнайы Үкіметтік құттықтау жеделхатын жолдады.Айта кету керек, ел мүддесі жолындағы еселі еңбектері үшін Ыдырыс Қалиев тәуелсіз еліміздің «Құрмет» орденімен, 2 рет Еңбек Қызыл Ту, «Отан соғысы», «Құрмет белгісі» ордендерімен және Қызылорда облысының, Қызылорда қаласының, Арал, Қазалы аудандарының Құрметті азаматы атағымен марапатталды.Ескерткіш-мүсіннің биіктігі – 1 метрді құрайды, тұғырының биіктігі – 2,3 метр. Қола материалынан дайындалған. Ескерткіш-мүсіннің авторы – суретші-мүсінші, КСРО және Қазақстан Суретшілер одағының мүшесі Амангелді Кененбаев.Қала күні қарсаңында өткен маңызды шаралардың бірі сол жағалаудағы «Нұрлы-Жер» бағдарламасы аясында салынған кредиттік тұрғын үйлердің кілтін табыстау рәсімі. Аймақ басшысы кезекте тұрған 20 тұрғынға жаңа пәтер кілтін табыстап, қоныстарымен құттықтады.«Мерекеге орай жаңа тұрғын үйді пайдалануға берудеміз. Енгізілген карантинге қарамастан аймағымызда құрылыс жұмыстары қарқынды жүруде. Жаңа үйлеріңіз жайлы, қоныстарыңыз құтты болсын!», – деді облыс әкімі Гүлшара Әбдіқалықова.Өз кезегінде жаңа пәтер алушылар да мемлекет тарапынан көрсетіліп жатқан қолдауларға алғысын жеткізді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
