Жуырда Қазақстан Республикасының Премьер-министрі Олжас Бектенов жұмыс сапарымен Қатар мемлекетіне барды.
Дохада Олжас Бектеновті Қатар Әмірі шейх Тәмим бен Хамад Әл Тәни қабылдады. ҚР Премьер-министрі Мемлекет басшысы Қасым-Жомарт Тоқаевтың шынайы сәлемі мен ізгі тілектерін жеткізді.
Үкіметтің хабарлауынша, кездесу барысында қазақ-қатар қатынастары ынтымақтастықтың барлық бағыттары бойынша жоғары қарқынмен нығайып келе жатқаны айтылған. Биылғы ақпан айында өткен Қазақстан Президенті Қасым-Жомарт Тоқаев пен Қатар Әмірі шейх Тәмим бен Хамад Әл Тәни арасындағы келіссөздер екі елдің ынтымақтастықты жаңа стратегиялық деңгейге көтеруге деген өзара ұмтылысын көрсетеді.
Сапар аясында Олжас Бектенов Қатар Премьер-министрі – сыртқы істер министрі шейх Мұхаммед бен Абдурахман Әл Тәнимен шағын және кеңейтілген құрамда келіссөз жүргізді.
Үкіметаралық кездесулердің мәні екі мемлекет басшылары қол жеткізген уағдаластықтардың орындалу барысы, сондай-ақ энергетика, ауыл шаруашылығы және т.б. салалар бойынша инвестициялық жобалардың сапалы әрі уақытылы іске асырылуына жәрдемдесу болды.
«Қатар – Қазақстанның араб әлеміндегі маңызды экономикалық серіктесі. Мемлекет басшысы Қасым-Жомарт Тоқаевтың Қатарға сапары шеңберінде қол жеткізілген уағдаластықтар біздің инвестициялық ынтымақтастығымызды сапалы жаңа кезеңге шығарады. Біз бұрын-соңды болмаған қомақты сома $17,6 млрд-ты құрайтын ауқымды және стратегиялық маңызды инвестициялық жобаларды іске асыру алдында тұрмыз» деді Олжас Бектенов.
Сондай-ақ Үкімет басшысы кездесуде Қазақстанның Қатар нарығына халал және органикалық ауыл шаруашылығы өнімдерін жеткізу бойынша серіктес болуға дайын екенін мәлімдеді. Қазіргі уақытта қазақстандық кәсіпорындар АӨК саласындағы жобаларды іске асыру бойынша қатарлық компаниялармен ынтымақтастық орнатуда.
Өз кезегінде Қатар Премьер-министрі – сыртқы істер министрі сауда-экономикалық және инвестициялық ынтымақтастықты одан әрі арттыруға мүдделі екенін растады.
«Екі ел арасындағы өзара іс-қимылды нығайтуға жақсы саяси негіз бар. Мемлекеттеріміздің басшылары бұған дейінгі сапар барысында ынтымақтастықты жоғары деңгейге шығарып, бірқатар бірлескен жобаларды іске асыруға дайын екендерін білдірді. Бүгінгі кездесуіміз жоғары деңгейде қол жеткізілген келісімдерді жүзеге асыруға мүмкіндік береді. Өз тарапымыздан біз екіжақты іс-қимылды кеңейтіп, тереңдету үшін жаңа бағыттарды зерттеуге дайынбыз» деді шейх Мұхаммед бен Абдурахман Әл Тәни.
Бұдан бөлек, тараптар мәдениет және білім беру, азаматтық авиация және туризм саласындағы өзара іс-қимыл мәселелерін талқылады.
Келіссөздер қорытындысы бойынша Қазақстан Республикасы мен Қатар мемлекетінің үкіметтері арасында негізгі салалардағы жобаларды дамыту үшін ұзақмерзімді стратегиялық әріптестік орнату туралы келісімге қол қойылды. Ірі инвестициялық жобалардың ішінде жалпы сомасы шамамен $5,7 млрд болатын газ өңдеу зауыттарын салу, $7,7 млрд болатын «Ақтөбе-Қостанай» магистральдық газ құбырының және «Бейнеу-Бозой-Шымкент» газ құбырының екінші желісін жүргізу, $2,7 млрд болатын қуаттылығы 1 100 МВт бу-газ қондырғысы негізінде электр стансасын және 350 МВт-тық су электр стансасын салу, сондай-ақ бидай, бұршақ және сүтті терең өңдеу зауыттарын салу жобалары бар.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
