С.Айтбаев атындағы көркемсурет галереясында Наурыз мерекесіне орай «Кенеп бетіндегі ұлт дәстүрі» атты көрменің ашылу салтанаты өтті.
Шараға өнер иелері мен студенттер және қала тұрғындары қатысты. Салтанатты шараны облыстық тарихи-өлкетану музейінің директоры Сапар Көзейбаев ашты.
– Қылқалам өнері өзінің тарихымен, мәңгілік идеясымен, жанрлық әр алуандығымен ерекшеленеді. Бүгінгі өнер иелерінің қайталанбас жұмыстары қала жұртшылығы мен қонақтарына эстетикалық тұрғыда рухани әсер қалдырады деген үміттемін, – деді Сапар Әлиасқарұлы.
Көрмеге жергілікті суретшілер А.Дүзелханов, Я.Ағытаев, жас суретші Д.Тойшыбаев және республикалық қылқалам шеберлерінің 30-ға жуық картинасы қойылды. Бірінші залда төл мерекенің мән-мағынасын сипаттайтын туындылар орналастырылса, екінші залда табиғаттың мың құлпырған бояуын бейнелейтін және тұрмыстық жанрдағы тамаша туындылар ұсынылды. Мереке қарсаңында картиналар арқылы Наурыз мейрамының шығу төркіні, мазмұны мен мәні, халықтың мәдени-рухани өміріндегі орны ерекше сипатта баяндалды.
Бабалар мұрасын жалғастырушы, шығармалары шексіз қиял мен сүйіспеншілікке толы өнер иелерінің қайталанбас жұмыстары қала жұртшылығы мен қонақтардың рухын көтерді.
Көрмені наурыз айының 30-на дейін тамашалауға болады.
Аружан ЕРАЛЫ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
