Қызылорда облысы бойынша 2024 жылдың 4 айында скарлатина ауруының 60 жағдайы тіркелді. Өткен жылдың осы кезеңімен салыстырғанда ауру деңгейі 26 жағдайға төмендеді. Басым көпшілігі облыс орталығының үлесінде – 57 жағдай және көбінесе 14 жасқа дейінгі балалар арасында анықталды.
Скарлатина- ауа-тамшылы жолмен берілетін инфекциялық ауру. Аурудың қоздырғышы «А» тобындағы стрептококк болып табылады, ағзаның улануымен, жедел тонзиллитпен және ерекше бөртпелермен сипатталады, негізінен балалар арасында жиі тіркеледі.
Аурудың көзі – скарлатинамен сырқаттанған науқастар және стрептококк инфекцияларын тасымалдаушылар. Ауру бірден қатты басталады, қалтырау, ден температураның күрт жоғарылауы байқалады, жүрек айну, бас ауруы, бұлшықеттің ауырсынуы, әлсіздік болады. Аурудың 1-2-ші тәулігінде баланың кеудесіне тұтас, ұсақ бөрткен қаптап шығады. Бөртпенің ұзақтығы 2-4 күн, аурудың жеңіл ағымында бөртпелер тез жойылады, ал ауыр жағдайларда 1 аптаға дейін сақталады. Скарлатина ауруының іріңді және аллергиялық асқынулары болуы мүмкін. Науқасты емдеу әдетте амбулаторлы жағдайда жүргізіледі, алайда ауыр ағымда немесе эпидемиологиялық көрсеткіштеріне байланысты ауруханаға жатқызылуы мүмкін.
Қызылорда облысының санитариялық-эпидемиологиялық бақылау департаменті аурудың алдын алу бойынша келесі сақтық шараларын ұсынады:
- Жеке бас гигиенасын ұстану, көшеден келгеннен кейін, ас ішу алдында қолды сабындап жуу, антисептектерді пайдалану;
- Адам көп жиналатын орындарға баруды мейлінше шектеу, бара қалған жағдайда әлеуметтік арақашықтықты сақтауға тырысу керек;
- Салауатты өмір салтын сақтап, ағзаны шынықтыру.
- Аурудың белгілері байқалған кезде өз бетімен емдеумен айналыспай, медициналық көмекке жүгіну қажет.
Динара Жанабергенова,
Қызылорда облысының
санитариялық-эпидемиологиялық
бақылау департаменті басшысы
>>> Біздің Facebook, Instagram парақшаларымыз бен Telegram каналымызға жазылыңыз! <<<
