Ауа райының қолайсыздығынан «Самара-Шымкент» автомобиль жолының Қызылорда облысы аумағында тұрып қалған жолаушыларға көмек көрсетілді.
Ақтөбе облысы аумағындағы ауа райының қолайсыздығына орай республикалық маңызы бар «Самара-Шымкент» автомобиль жолының 1240-1357 шақырымы аралығы толықтай жабылған. Осыған байланысты Қызылорда облысы аудандар ының тұсында көлік қозғалысы тоқтатылып, жолда қалған адамдарға тиісті көмек көрсетілуде.
Арал, Қазалы, Қармақшы, Жалағаш, Сырдария, Жаңақорған, Шиелі аудандары мен Қызылорда қаласының әкімдігі жолаушыларды орналастырып, қажетті азық-түлік пен дәрі-дәрмектермен қамтамасыз етуде.
Қызылорда облысындағы кемпингтерде 2636 автокөлік (2085 ауыр жүк көлігі, 532 жеңіл автокөлік, 19 жолаушылар көлігі), 4410 жолаушы тоқтаған.
«Осыған байланысты қала және аудан әкімдіктері жол бойы сервистік кешендерінде азық-түліктің, жанар-жағар май, газдың жеткілікті болуын, ал облыстық кәсіпкерлік және өнеркәсіп басқармасы Арал, Қазалы аудандарындағы май және газ құю бекеттерінің бағаны негізсіз өсірмеуін, жеткілікті деңгейде босатылуын қатаң қадағалауда. Облыстық білім, спорт, мәдениет басқармалары жолаушыларды жақын маңдағы жатақханалар, спорт кешендеріне, клубтарға орналастыру мүмкіндіктерін қарастыруда. Облыстық денсаулық сақтау басқармасы жедел жәрдем қызметінің үздіксіз жұмысын үйлестіруде. Полиция басқармалары жолаушылар орналасатын аумақтарға кезекшілік ұйымдастыруда. Жолаушылар ыстық тамақпен, тағы да басқа тұрмыстық заттармен қамтамасыз етілді. Қосымша дәрі-дәрмек және медициналық көмек көрсетілуде. Барлық кешенде азық-түлік, дәрі-дәрмек және ауыз су жеткілікті. Жол бойындағы жағдай облыс әкімі Нұрлыбек Нәлібаевтың тұрақты бақылауында тұр», – деп мәлім етті Қызылорда облысы әкімдігінен.
>>> Біздің Facebook, Instagram парақшаларымыз бен Telegram каналымызға жазылыңыз! <<<
