Қазақстан мұсылмандар діни басқармасы жанынан құрылған «Зекет және қайырымдылық» қоры жыл бойы қайырымдылық шараларын дәстүрлі түрде жүргізіп келеді. Биыл қордың бастамасымен рамазан айында «Ел үлесі пәтерге» жобасы бойынша облысымыздағы 1 отбасыға баспана сыйлады. Бұл туралы өңірлік коммуникациялар қызметінде ҚМДБ «Зекет және қайырымдылық» қорының облыс бойынша өкілі Оңталап Жидебаев айтып берді.
– Тұрғындардың қолдауымен «Өмірге үміт сыйла!» акциямыздың шеңберіне аймағымыздағы дертке шалдыққан 4 баланың емделуіне қаражат бөлдік. «Аналарға алғыс» атты шара аясында 500 отбасын, «Жетім көрсең, жебей жүр!» жобасымен 450 отбасын, «Қайырымдылық жасасаң, қайырын өзің көресің» бастамасымен 1300 отбасын қуанттық.
Облыстық медицина орталығына 100 адамға, Жедел жәрдем орталығына 70 адамға, қалалық ауруханадағы 200 қызметкерге ауызашар қоржынын үлестірдік. Республикалық «Берекелі рамазан» акциясы бойынша 1400 отбасыға қайырымдылық жасалды, – деді қордың өңірдегі жетекшісі.
Сонымен қатар, «Зекет және қайырымдылық» қоры рамазан айында 60 отбасыға қаржылай көмек көрсетсе, аймағымыздағы мыңдаған тұрмысы төмен отбасыға азық-түлік және тағы басқа қолдаулар жасалды. Айта кетейік, игі істердің ұйытқысы болған қордың сауапты істері мен қайырымдылығы тек ораза кезінде ғана емес жыл бойы жүргізіледі.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
