Қазақстан Республикасы Білім және ғылым министрлігінің қолдауымен ҚР Тәуелсіздігінің 30 жылдығы аясында жыр алыбы Жамбыл Жабаевтың 175 жылдығына орай Қорқыт ата атындағы Қызылорда университетінде студенттер арасында республикалық жас ақындар айтысы өтті.
Қазақтың төл өнері айтысты жастар арасында насихаттау, ұлттық бірегейлікті сақтай отырып, өскелең ұрпақты ұлттық өнерге баулу мақсатында ұйымдастырылған дүбірлі додада еліміздің жоғары оқу орындарынан келген 14 ақын өнер көрсетті.
«Бүгінгі айтыс Қазақстан Республикасы Білім және ғылым министрлігінің бастамасымен Тәуелсіздіктің 30 жылдығы мерейтойы аясында Жыр алыбы Жамбыл Жабаевтың 175 жылдығына орай ұйымдастырылып отыр. Айтыс-қазақтың қанына сіңген бекзат өнер. Ұлттық құндылығымызды тілге тиек еткенде Жамбыл Жабаев есімі бірге жырланады. Жүз жылдық ғұмырында артында сан ғасырлар бойы өшпейтұғын із қалдырып, оның асыл мұрасы бүгінде сіз бен бізге өнеге ретінде қалыптасты. Осы ұлттық құндылықты сақтап қалу үшін өткенді саралап бүгінгіні бағалап отыру – басты мақсат.Тәуелсіздік алған жылдардан бастап мәдениетіміз, өнеріміз жаңа қарқынмен қайта жаңғырды. Ана тіліміздің мәртебесі көтеріліп, рухани дами түстік. Сіздер тәуелсіз елдің ұланысыздар, бүгінгі заманның еркесі мен еліміздің ертеңісіздер. Сондықтан Сіздердей жалынды жастар барда ұлттық өнеріміз тек қарыштап дами береді», – деді университет Басқарма төрағасы-Ректор Бейбіткүл Кәрімова айтыстың ашылу салтанатында.
Республикалық айтыста Әл-Фараби атындағы Қазақ ұлттық университеті, Л.Н.Гумилев атындағы Еуразия Ұлттық университеті, Қазақ Ұлттық өнер университеті, Құрманғазы атындағы Қазақ Ұлттық консерваториясы, Т.Қ.Жүргенов атындағы Қазақ Ұлттық өнер академиясы, Абай атындағы Қазақ Ұлттық педагогикалық университеті, Д.Серікбаев атындағы Шығыс Қазақстан техникалық университеті, Е.А.Бөкетов атындағы Қарағанды университеті, І.Жансүгіров атындағы Жетісу университеті, Х.Досмұхамедов атындағы Атырау университеті, М.Өтемісов атындағы Батыс Қазақстан университеті, Павлодар педагогикалық университеті атынан жас ақындар бақ сынады.
Өнер додасында бабы мен бағы қатар жанып, республикалық жас ақындар айтысында бас жүлдені Абай атындағы Қазақ Ұлттық педагогикалық университетінің студенті Алтынай Қанапия иеленді. Жүлделі 1-орыннан Қорқыт ата атындағы Қызылорда университетінің 2-курс студенті Жамбыл Бақытәлі көрінсе, 2-орын Әл-Фараби атындағы Қазақ ұлттық университетінің Ұларбек Жеңісбек пен университетіміздің 4-курс студенті Бексұлтан Орынбасаровқа табысталды. Ал Е.А.Бөкетов атындағы Қарағанды университетінің 4 курс студенті Еркеғали Бекболат пен Павлодар педагогикалық университетінің 1-курс студенті Мизан Жұмали 3-орынды теңдей бөлісті. Сонымен қатар, Махамбет атындағы Батыс Қазақстан Университетінің 2-курс студенті Әділ Ахметовке, Құрманғазы атындағы Қазақ ұлттық консерваториясының студенті Бақтыбай Саулетбайға, Еуразия Ұлттық Университетінің студенті Бекзат Құлшарға, Ілияс Жансүгіров атындағы Жетісу университетінің 4 курс студенті Айдана Бекберген, Дәулет Серікбаев атындағы Шығыс Қазақстан Техникалық Университетінің 4 – курс студенті Дарын Шағымановке ынталандыру сыйлығы берілді. Орамды ойы мен сөзі келісіп, халықтың ықыласына бөленген Т.Қ.Жүргенов атындағы қазақ ұлттық өнер академиясы 3 курс студенті Саламатов Мейірбек айтыстың ақтаңгері Мұхтар Ниязовтің арнайы жүлдесімен марапатталса, Халел Досмұхамедов атындағы Атырау университетінің 4 курс студенті Фариза Жетпісбаева Ректордың арнайы жүлдесін иеленді.
Салтанатты шараның марапаттау рәсімінде Қорқыт ата атындағы Қызылорда университетінің студенті Бексұлтан Орынбасарға Абай атындағы Қазақ ұлттық пелагогикалық университетінің ұйымдастыруымен 2022 жылдың ақпаны айында өтетін дәстүрлі «Менің пірім-Сүйінбай» халықаралық жас ақындар айтысына жолдама берілді.
Аталмыш шара қарсаңында, университеттің студенттер сарайында «Алтын домбыра» айтыс орталығының тұсауы кесілді. Орталық қазақтың төл өнері айтысты жастар арасында кеңінен насихаттап, жас ақындардың шығармашылығын шыңдау үшін мүмкіндік жасайды. Айтыскер ақындар шеберлік сағаттарын өткізіп, ақсүйек өнер айтысты ұрпақтан-ұрпаққа қалдыру мақсатында жұмыс жасамақ. Бәдік айтыс, түре айтыс, сүре айтыс сынды айтыстың түрлерін жандандыру жұмыстары да жолға қойылатын болады.
Айтыс орталығының жабдықталуына және республикалық шараның жоғары деңгейде өтуіне облыстық мәслихат депутаты, жастар қолдаушысы Мағжан Ералиев, жүлделі орындар мен ынталандыру сыйлықтарына Қызылорда қалалық мәслихатының депутаттары, өнер жанашырлары Қайрат Ерназаров, Мұса Абдуқалықов, Жасұлан Жарасбаев демеушілік жасады.
Республикалық додаға айтыскер ақын, Қазақстан Республикасы Мәдениет саласының үздігі Серік Ыдырысов, айтыскер ақын, халықаралық, республикалық айтыстардың жүлдегері Мамыр Байдаулетов, айтыскер ақын әрі жырау, Қазақстан Республикасы Мәдениет саласының үздігі Айдос Рахметов,республикалық деңгейдегі айтыскер ақын Ержеңіс Әбді, университеттің Дәстүрлі өнер институтының директоры, философия докторы Ғани Байуловтөрелік жасады.
Сондай-ақ, ақындар бәйгесін облыстық, қалалық мәслихат депутаттары, облыстық басқарма басшылары, зиялы қауым өкілдері, БАҚ өкілдері, университеттің Директорлар кеңесінің мүшелері, оқытушылары мен білім алушылары тамашалады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
