Кеше облыс әкімі Гүлшара Әбдіқалықова «Көлік қызметкерлері күні» кәсіби мерекесіне орай сала қызметкерлерін қабылдады деп хабарлайды облыс әкімінің баспасөз қызметі.
Облыста бұл салада 15 мыңнан астам адам еңбек етеді. Кәсіби мереке қарсаңында 50 қызметкер облыстың Құрмет грамотасымен және облыс әкімінің Алғыс хатымен марапатталды. Олардың ішінде жүргізуші, жолшы, ұшқыш, машинист, жолсерік, вагон қараушы, диспетчер және басқа да мамандық иелері бар.
Қабылдауда еңбек өтілі 43 жылды құрайтын «ТрансТурСервис» ЖШС автобус жүргізушіcі Елубай Күдербаевқа, 50 жыл осы салада тер төгіп келетін «Талап и К» ЖШС қызметкері Виктор Лиге облыстың Құрмет грамотасы және 39 жыл қызмет етіп келе жатқан «БауТЛ и К» ЖШС маманы Алма Ерназароваға, «Қасқабаева» жеке кәсіпкерлігінің жұмысшысы Дастанбек Тынымбетовке облыс әкімінің алғыс хаты табысталды. Карантин шектеулеріне байланысты өзге де қызметкерлер марапаты жұмыс орындарында табысталады.
Айта кетейік, облыста 212 елді мекенді аудан және облыс орталығымен байланыстыратын 204 автобус маршруты ұйымдастырылған.
«Қызылорда-Ташкент» бағытына халықаралық 1 автобус маршруты, Нұр-Сұлтан, Алматы, Шымкент, Жезқазған, Түркістан, Сарыағаш, Ақтөбе және басқа да қалаларға облысаралық 13 автобус маршруты ұйымдастырылып отыр.
Әуежай қызметі – көлік саласындағы маңызды буынның бірі. Биылғы жаз маусымында «Қорқыт Ата» әуежайы арқылы аптасына 37 рейске дейін ұшулар орындалды (Нұр-Сұлтан қ. – 21 рейс, Алматы – 14 рейс және Қарағандыға – 2 рейс). 2020 жылдың маусым айынан бастап Нұр-Сұлтан, Алматы қалаларына «Skat», «Qazaq Air» әуекомпанияларының күнделікті рейстері ұшуда.
Сонымен бірге облыстан өтетін магистральдық темір жол желісінің жалпы ұзындығы 1055 шақырымды құрайды және 8 темір жол вокзалы жолаушыларға қызмет көрсетуде.
Облыс аумағынан 19 жұп жолаушы пойызы, оның ішінде мемлекетаралық бағыттағы 7 жұп пойызы өтсе, облыс орталығынан 6 жұп пойызы ұйымдастырылған.
Көлік қызметінде мүмкіндігі шектеулі азаматтардың (автомобиль, темір жол және әуе көлігінде) қолжетімділігін қамтамасыз ету қарастырылған.
«Бүгінгі таңда көлік саласы – халқымыздың әлеуметтік-экономикалық жағдайына тікелей әсер ететін экономиканың негізгі күші. Кәсіби мерекелеріңізбен шын жүректен құттықтаймын және еселі еңбектеріңіз үшін үлкен алғысымды білдіремін. Қазір біз үшін ең басты міндет – пандемиямен күресу. Осы бағытта да жолаушылар тасымалы барысында халықты сақтандыру шаралары қарқынды қамтамасыз етілген. Бұл қиындықтан бірге міндетті түрде шығамыз», – деді облыс әкімі.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
