Нұр-Сұлтан қаласындағы Қазақстан Кубогы үшін болған финалдық ойында «Қайсарды» үш мыңға жуық жанкүйер қолдады. Жеңіс туын желбіреткен тарихи сәтке Қызылордадан қоса аттанған жерлестерімен қатар елордадағы сырбойылықтар да куә болды. Өңірлік коммуникациялар қызметінде өткен брифингте қайсарлықтармен қатар облыстық дене шынықтыру және спорт басқармасының басшысы Олжас Акимов та алған әсерімен бөлісті.
– Басқармаға басшы боп тағайындалған сәттен бастап Кубокты алу керек деген мақсат қойдық. 2017 жылы Премьер-лигада 6-орында болсақ, былтыр 5-орынға көтерілдік. Ал биыл 3-орынға шығамыз немесе Кубокты аламыз деп жоспарладық. Нәтиже жаман емес. Маңдай термен жеңіске жеттік. Енді неге Еуропаның шыңына шықпасқа?! Менің қуанғаным – тарихи голды жерлесіміз Думан Нәрзілдаевтың салғаны, – деді О.Акимов.
Күрделі жөндеуден өткен Ғ.Мұратбаев атындағы орталық стадион еуропалық стандартқа сай. Басқарма басшысы алаңда азулы командаларды қабылдауға дайын екенін айтты. Оған қоса, «Қайсар» ойыншылары «Байқоңыр» командасы арқылы толықтырылуда. Ондағы спортшылар да ешкімнен кем емес. Финалда жеңіс сыйлаған Думан Нәрзілдаев та – сол команданың түлегі.
– Әлі күнге дейін сол толқыған, қобалжыған күйімнен шыға алмай жүрмін. Ерекше сәт болды. Бұл – менің кіндік қаным тамып, бұғанамды қатайтып, қанат бітірген туған жерімнің, қолдау көрсетуден аянып қалмайтын туған елімнің жеңісі. Жеңіс құтты болсын, жерлестер! – деді тарихи голдың авторы.
Бас бапкер Стойчо Младенов өз қызметін жалғастыра береді. Ал алдағы жылдың қаңтар, ақпан айларынан бастап Еуропа лигасына күшейтілген режимде дайындықты бастайды. Қазіргі құрамның 80 проценті қалдырылады деп күтілуде. Брифингке «Қайсар» футбол клубының директоры Серік Доспанбетов те қатысты.
– Бұл – Сыр елінің жеңісі. Ойыншылар да, жанкүйерлер де бар күш-жігерімізді жұмсадық. Сондықтан, жеңіс құтты болсын, жерлестер! Алдағы уақытта да «Қайсардың» жұлдызы жарқырай түсетініне сенімім кәміл, – деді ол.
Жиында қайсарлықтар Еуропа лигасына байланысты мақсат біреу, ол – жеңіспен оралу десті. Осындай асқақ рух, ынта мен жігерді бойға жиған команда келер жылғы маусымды үлкен дайындықпен бастамақ.
Дәулет ҚЫРДАН.
>>> Біздің Facebook, Instagram парақшаларымыз бен Telegram каналымызға жазылыңыз! <<<
