Қазанның алғашқы жексенбісіндегі Ұстаздар мерекесі биыл ерекше аталып өтілуде. Жас ұрпақтың шамшырағын жаққан жандарды ұлықтау бір күнмен толастамақ емес. Шәкірттерінің алғысына бөленіп, құшағы гүлге толған ұстаздар мереке қарсаңындағы ең басты жаңалық – Елбасы Жолдауында айтылған «Педагог мәртебесі туралы» Заңның қабылданатыны үшін болды.
Облыс әкімдігінде үздік, жаңашыл ұстаздар бас қосқан кездесу өтіп, онда облыстық мәслихат хатшысы Н.Байқадамов аймақ басшысының атынан барша мұғалімдерді мерекемен құттықтады. Мемлекеттің өркениетке бастаған керуен-көшін ғасырдан ғасырға жалғастыру үшін ұрпақ тәрбиесінің маңызы зор. Елдің ертеңі – бүгінгі оқушыларға әріп танытып, адам бойында болатын барлық қасиеттерінің кілтін тапқан ұстаздар қауымы қандай құрметке де лайық.
Педагогтардың қоғамдық мәртебесін және беделін арттыру, іс-тәжірибесін тарату мақсатында жыл сайын республикалық «Үздік педагог» конкурсы өтеді. Кездесуге биылғы конкурс қорытындысымен жеңімпаз атанған облыстың 3 педагогы – И.Әбдікәрімов атындағы аграрлық-техникалық жоғары колледжінің арнаулы пән оқытушысы М.Әйтенова, Е.Әуелбеков атындағы №4 дарынды балаларға арналған мектеп-интернаттың мұғалімі Ә.Жақсылықова, Назарбаев зияткерлік мектебінің мұғалімі Д.Мұнарбаева қатысты.
Биыл алғаш рет мұғалімдерді аттестациялаудың жаңа жүйесі енгізілді. Салтанатты шарада «Педагог-шебер» біліктілік санаты бойынша тестілеуден өтіп, жоғары нәтиже көрсеткен Арал аудандық №14 мектеп-лицейдің мұғалімі Ж.Кунарова мен Жаңақорған аудандық №163 орта мектептің мұғалімі Л.Жұмабековаға куәлік табысталды. Ұстаздар өз ой-пікірлерін ортаға салып, жаңа бастамалардың, оқытудың инновациялық тәсілдерінің артықшылықтары туралы айтты.
Басқосуды облыс әкімінің орынбасары Р.Рүстемов қорытындылады. Ағылшын оқымыстысының «Жай мұғалім хабарлайды, жақсы мұғалім көрсетеді, керемет мұғалім түсіндіреді, ал ұлы мұғалім шабыттандырады» деген сөзін мысалға келтіріп, кездесуге келген мұғалімдерді мерекемен және марапаттарымен құттықтады.
«СБ» ақпарат».
>>> Біздің Facebook, Instagram парақшаларымыз бен Telegram каналымызға жазылыңыз! <<<
