Аймақта «Ұлттық сараптау және сертификаттау орталығы» АҚ Қызылорда филиалының құрылыс материалдарын сынақтан өткізуге арналған сынақ зертханасы өз жұмысын бастады. Оның ашылу салтанатына құрылыс саласының мамандары қатысып, зертхананың жұмысымен танысты.
Құрылыс өнімдерінің сапасы мен қауіпсіздігін бақылау мен халықтың қауіпсіздігін қамтамасыз етуді және кепілдендіруді мақсат еткен орталық құрылыс өнімінің 23 түрін сынақтан өткізуге дайын. Яғни, барлық құрал-жабдықпен қамтылған зертханада өнімнің аязға төзімділігін, су сіңіру, орташа тығыздық, фракциялық құрамы, ылғалдылық, жылжымалылық, қаттылық, табиғи радионуклидтердің нақты тиімді белсенділігі секілді басқа да негізгі факторларын анықтайды.
– Бұл зертхана цементтің металл және металл емес тотықтарын, әк және әк ұнына – металл және металл емес белсенді тотықтарын, кальций және магний карбонаттары, кальций оксидіне есептелінген еркін сілтілер, суда еритін және ерімейтін заттарды анықтау бойынша сынақ жүргізеді. Ендігі жерде құрылыс өнімдерін шығаратын және құрылыс-монтаждау жұмыстарын жүргізетін мекемелермен жұмыс жасауға дайынбыз. Мұнда барлық жағдай қарастырылған. Өнімнің сапа сәйкестігін анықтауға толық мүмкіндігіміз бар, – дейді сынақ зертханасының меңгерушісі Мария Ахметова.
Мейрамгүл ДАУЫЛБАЙҚЫЗЫ,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
