Жақында құтқарушылар кәсіби мерекесін атап өтті. Мереке қарсаңында Қызылорда қаласында №7 өрт сөндіру бөлімі қайта жаңғыртылып ашылды. Рәсімге облыс әкімінің орынбасары
Марат Делмұханов, облыстық ТЖ органдарының ардагерлері мен қызметкерлері және қала тұрғындары қатысып, бөлімнің жұмысына оң бағасын берді.
Айта кету керек, қала орталығында орналасқан бұл ғимараттың іргесі 1966 жылы қаланып, екі жылдан кейін қолданысқа берілген. 1981 жылға дейін мұнда кәсіби өрт бөлімі, 1981-1996 жылдары Ішкі істер басқармасына қарасты №64 әскерилендірілген өрт бөлімі болды. 1996 жылдан бастап 10 жылдай қалалық отряд, 2009 жылға дейін Қызылорда қаласы өртке қарсы қызмет басқармасы қоныстанды. 2009-2011 жылдары «Өрт сөндіруші» АҚ филиалы және 2011-2017 жылдар аралығында кәсіби дайындық мектебі орналасты.
Салтанатты шара мұнан әрі А.Тоқмағамбетов атындағы мәдениет үйінде жалғасты. Құтқарушылар күніне арналған кеш өз қызметтік міндеттерін орындау кезінде қаза болған әріптестерінің рухына тағзым етуден басталды. Мұнан соң облыс әкімінің орынбасары М.Делмұханов барша құтқарушылар қауымына аймақ басшысының құттықтауын жеткізді.
– Құтқарушы – халықтың тыныс-тіршілігін, аумақтың қауіпсіздігін қамтамасыз етуде мемлекеттік маңызы бар мәртебелі мамандық. Бұл – үнемі жанқиярлық пен ерлікке әзір тұратын өмір салты. Тек батыл, ержүрек, және табанды адамдар ғана құтқарушы мамандығын таңдайды. Себебі, сіздер күн сайын қиын да қауіпті жағдайда түрлі сипаттағы қатерлерге қарсы тұрып, батыл әрі адал қызмет көрсетесіздер. Бүгінгі мереке – сіздердің осы қызметтеріңізге құрмет. Кәсіби мерекелеріңізбен шын жүректен құттықтаймын, зор денсаулық, отбасыларыңызға амандық, кәсіптеріңізге береке тілеймін, – делінген құттықтауда.
Шара барысында әріптестерін облыстық төтенше жағдайлар департаменті бастығының орынбасары Руслан Қайрақбаев Ішкі істер министрі, полиция генерал-майоры Ерлан Тұрғымбаевтың мерекелік құттықтауымен таныстырды. Мұнан кейін бірқатар қызметкерлер түрлі марапатқа ие болды. Жиын соңы мерекелік концертке ұласты.
>>> Біздің Facebook, Instagram парақшаларымыз бен Telegram каналымызға жазылыңыз! <<<
