Қоғамда түрлі пікір бар. Алайда, нақты жағдайға жүгінудің артықшылығын екінің бірі біледі. Ұлттық сараптама орталығы Қызылорда облысы бойынша филиалының вирусология зертханасы коронавирус індетін анықтауда ауқымды жұмыстар атқаруда. Биылғы наурыз айынан бастап «COVID-19» вирусына күдіктілер, қарым-қатынаста болғандар, ЖРВИ, пневмониямен ауыратындар, жоспарлы түрде ауруханаға жатқызылатындар, індет жұқтыру қаупі бар медицина қызметкерлері мемлекеттік тапсырыс негізінде ПТР әдісімен зертханалық зерттеулер жүргізуде.
Нақтылап айту керек, коронавирус жұқпасын анықтауға қажетті барлық зерттеулер басқа қаладағы зертханаларға жіберілмейді. Бізде, яғни, Ұлттық сараптама орталығы облыстық филиалының вирусологиялық зертханасы базасында жүргізіледі. Облыс бойынша бүгінгі күнге 272 жағдай нақтыланып, эпидемиологиялық шаралар жүргізілді. Эпидмаусым басталғалы облыс көлемінде коронавирус жұқпасын анықтауда 22900 зертханалық зерттеу жасалды.
Зертхана 3 299 зерттеуге жеткілікті 66 тест жүйесімен қамтамасыз етілген. Эпидмаусым басталғалы зерттеулер қытайлық BGI компаниясының ПТР әдісімен тестілеуге арналған тест жүйесімен жүргізілуде. Зерттеу барысында аталған тест жүйесін қолдануда ешқандай ауытқулар орын алған жоқ. ПТР әдісімен тестілеу нәтижесі 99,9%-ті құрайды.
Әлемде пандемия сипатын алған коронавирус індетінің таралуын тоқтату мен аурудың алдын алу үшін тиімді, нәтижелі жұмыстар жүргізу мақсатында білікті мамандардан құрылған 3 бригада тәулік бойы қызмет атқаруда. Күніне 500-600 анализ қорытындысын, есебін уақытылы дайындау үшін филиалда call-center ұйымдастырылды. Сall-center жұмысына филиалдың барлық ұжымы жұмылдырылды.
Нақтыланған жағдайлар, қарым-қатынаста болғандар, күдікті ауру ошақтарында залалсыздандыру жұмыстары жүргізілді. Оны облыс көлемінде тиімді іске асыру мақсатында 14 дезинфекциялық бригада құрылды. Оның төртеуі қала бойынша, қалғаны аудандарда. Әр бригадада 3-4 маманнан қамтылған. Олар жедел хабар алған сәттен бекітілген алгоритмге сәйкес 15 минут ішінде ауру ошағына залалсыздандыру жұмыстарын жүргізуге жетеді. Ауру ошағында залалсыздандыру жұмысы дезинфекциялық препараттың нұсқаулығына сәйкес 30-60 минут аралығында жасалады. Науқастың жеке заттары, ол жанасқан заттар дезинфекциялық препаратпен, төсек орны камералық залалсыздандырудан өткізіледі. Залалсыздандыру себу, батыру, сүрту, шашу әдістерімен жасалады. Коронавирус жұқпасынан басқа туберкулез, тері аурулары ошақтары, сонымен қатар, аса қауіпті жұқпалы Қырым қанды геморрагиялық қызбасы, жедел ішек аурулары ошағына қорытынды дезинфекция жасалуда. Ауру ошағындағы қорытынды залалсыздандыру жұмысы науқас оқшауланғаннан кейін және стационарға жатқызылғаннан кейін немесе қайтыс болған жағдайда жасалады.
Жоғарыда аталған қызметтерден басқа, филиалда бактериологиялық, паразитологиялық, санитарлық-химиялық, радиологиялық, жоғары технологиялық зерттеулерді және инструменталды өлшемдерді ГОСТ ISO/IEC 17043-2013 «Сәйкестікті бағалау. Біліктілікті тексеруге қойылатын негізгі талаптар», ГОСТ ИСО/ХЭК 17025-2009 «Сынақ және калибрлеу зертханаларының құзыреттілігіне қойылатын жалпы талаптар», СТ РК ISO 15189-2015 «Медициналық зертханалар. Құзыреттілікке қойылатын талаптар» халықаралық стандарттарға сай аккредиттелген, Сапа менеджменті жүйесі бойынша сәйкестік сертификаты бар зертханалар қызмет көрсетуде.
Жүйелі түрде аккредитация аумағын кеңейту жұмыстары жүргізіледі. Облыстық және барлық аудандық бөлімшелер зертханалары халықаралық стандарт талаптарына сәйкес аккредитациядан өткен.
Материалдық-техникалық базаны нығайту, автопаркті жаңа арнайы автокөліктермен толықтыру, сонымен қатар мамандар біліктілігін арттыру бағытында тиісті жұмыстар атқарылып келеді. Жалпы, мамандарымыздың еліміздегі ғылыми орталықтарда, алыс-жақын шетелдерде білімін жетілдіру, мемлекеттік тапсырысты, аймақтық номенклатураны, Кедендік одақтың Техникалық регламенттер талаптарын орындау басты назарда. Ал қазіргі басты міндет – дүние жүзін жайлаған қауіпті індетті ел болып жұмыла жеңу. Осы бағыттағы қызметіміз жалғаса бермек.
Фарида Қалиева,
ҚР ДСМ ТКҚҚСБК Ұлттық сараптама орталығының Қызылорда облысы
бойынша филиал директоры.
>>> Біздің Facebook, Instagram парақшаларымыз бен Telegram каналымызға жазылыңыз! <<<
