Анкара қаласында белгілі жазушы, драматург Жолтай Жұмат Әлмашұлының «Махаббат және өшпенділік» атты кітабының таныстырылымы өтті.
Мазмұнды іс-шараға ТҮРКСОЙ-дың Бас хатшысы Сұлтан Раев, Еуразия Жазушылар одағының төрағасы Якуп Өмероғлу, Қазақстан мәдениет және сауда орталығы төрағасының орынбасары, Дүниежүзі қазақтары қауымдастығының Түркиядағы өкілі Ержан Уәйіс, Түрік тілі мен әдебиетінің профессоры, академик Орхан Сөйлемез, Түркиядағы Қазақстан елшілігінің кеңесшісі Мерей Мұқажан және сондағы қазақ диаспорасының өкілдері қатысты.
ТҮРКСОЙ-дың Бас хатшысы Сұлтан Раев жазушы шығармашылығы туралы ой өрбітіп, кештің өтуіне ұйытқы болған Қазақстанның Түркиядағы елшілігі мен Еуразия Жазушылар одағына алғысын айтты. Еуразия Жазушылар одағының төрағасы Якуп Өмероғлу қаламгер шығармалары қазақ халқының ұлттық құндылықтарын дәріптейтініне тоқталды. Әдебиет зерттеушісі, ғалым Орхан Сөйлемез автордың түрік тіліне аударылған бұл еңбегі туралы пікір-пайымын жеткізді.
Автор өз сөзінде осыдан 30 жыл бұрын Алматыда ТҮРКСОЙ ұйымының құрылтай құжаттарына қол қою үрдісіне үлес қосқанын айтты. Бүгінде ұйымның 30 жылдығында Түркияда жарық көрген екінші кітабының тұсаукесері өтіп жатыр. Түркі әлемінің айтулы тұлғалары әл Фараби мен Қожа Ахмет Ясауи туралы жазған туындыларына тоқталған ол түбі бір туыс халықтардың ынтымағы арта беруіне тілектестік білдірді.
>>> Біздің Facebook, Instagram парақшаларымыз бен Telegram каналымызға жазылыңыз! <<<
