«Достық үйінде» «Қазақстан халқы Ассамблеясы: мемлекеттік саясатты іске асырудың миссиясы, міндеттері мен тетіктері» тақырыбында республикалық семинар-тренинг басталды. Маңызды шараның ашылуына облыс әкімінің орынбасары Наурызбай Байқадамов қатысып, семинардың орамды ой мен ұтымды ұсыныс айтылатын алаңға айналарына сенім білдірді. Бір мақсат, бір мүдде жолында бірлесе жұмыс істеуге шақырды.
Семинардың негізгі аудиториясы Жамбыл, Алматы, Түркістан облыстарынан келген мемлекеттік қызметшілер, құқық қорғау органдарының қызметкерлері, өңірлердегі ҚХА хатшылығының мамандары мен этномәдени бірлестік өкілдері болды. Жиында Президент Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауы, Елбасы Нұрсұлтан Назарбаевтың «Болашаққа бағдар: рухани жаңғыру», «Ұлы даланың жеті қыры» атты бағдарламалық мақалаларының шеңберінде айқындалған жалпыұлттық бірлік пен бірегейлікті қалыптастыру міндеттері талқыланды. Спикерлер полиэтникалық қоғамда инклюзивті әдістерді қолдану қажеттігін де ортаға салды. ҚР Президенті жанындағы Мемлекеттік басқару академиясы Орталық Азия өңіріндегі этносаралық және конфессияаралық қатынастарды зерттеу орталығы жетекшісінің орынбасары, ҚХА ҒСК мүшесі, саяси ғылымдарының кандидаты Дастан Көшербаев бұл мәселеге айрықша қолдау керектігін, инклюзивті қоғамды дамыту әлі де ауқымды жұмыстарды талап ететінін алға тартты.
– Елімізде инклюзияны, ең алдымен, мүмкіндігі шектеулі адамдармен жұмыс істеу тұрғысынан қарастыру дәстүрге айналған. Алайда, инклюзияның барлық салада салмағы бар. Инклюзивті мәдениет қалыптастыру ашық позиция ұстануға, өз пікірін білдіріп ғана қоймай, өзгенің ойымен санасуға, мәдени айырмашылық пен түрлі позицияларға қарамастан, диалог жүргізуге дайын болуға мүмкіндік береді, – деді Д.Көшербаев.
Бұдан бөлек, басқосуда азаматтық құқықты қорғау, «Рухани жаңғыру» бағдарламасының сыбайлас жемқорлыққа қарсы мәдениетті қалыптастырудағы ролі айтылды. Ұйымдастырушылардың айтуынша, семинар әлі екі күнге созылады.
Мөлдір ҚАЛЫМБЕТ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
