Дені сау адам – табиғаттың ең қымбат жемісі. Бірақ осы сөздің салмағын шынайы сезініп, түсінбейтін секілдіміз. Қазір салауатты өмір салтын сақтау туралы көп айтылуда. Десе де, оны әркім әрқалай ұғынады.
Салауатты өмір салтын қалыптастыру үшін қандай жағдайларға назар аудару керек? Бұл – жеке адамның тіршілік етуге бағытталған мүмкіндіктерін қалыптастыру. Денсаулыққа жағымсыз әрекеттерден – нашақорлық, шылым шегу, ішімдік ішу, улы заттардан аулақ болу. Мықты денсаулыққа дене шынықтыру арқылы қол жетеді. Дене қозғалысы адам ағзасын дамытып, жұмыс істеу қабілетін арттырады, ауруды алыстатып, өмірді ұзартады.
Денсаулық – адамға табиғаттың берген ең қымбат құндылығы. Адам денсаулығын қалыптастыру және нығайту медицинаның ғана емес, білім беру жүйесінің де негізгі мақсаты мен міндеті. Себебі, шәкірт денсаулығы жағдайы оның оқу үлгеріміне, мінез-құлқына, қарым-қатынастарына тікелей әсер етеді. Сондықтан, педагогтар алдымызға келген әр оқушының дені сау болуын бақылаймыз. Оқушыны сауықтыруда дене шынықтыру пәні жетекші орынға ие. Бұл ретте басқа пәндердің де үлесі болуы керек.
Ол үшін ұстаздар шәкірт бойына жақсы дәстүрлер мен әдеттерді сіңіріп, салауатты өмір салтын сақтаудың қажеттілігі мен оны іске асырудың жолдарын үйретуі қажет. Режимнің дұрыс сақталмауы, қимыл-қозғалыстың аз болуы, дұрыс тамақтанбау, жағымсыз жағдайлардың көп болуы, зиянды әдеттерге үйірсектік келеңсіздікке ұшыратады.
Жасөспірімдердің денсаулығын нығайту, жүйке психикасын дұрыс қалыптастырып, ширақ, жігерлі, сымбатты етіп өсуіне негіз қалау – ата-ана мен педагогтардың алдында тұрған үлкен міндет.
Назерке Қуаныш,
№7 мектеп-лицейдің
ағылшын тілі пәні мұғалімі
>>> Біздің Facebook, Instagram парақшаларымыз бен Telegram каналымызға жазылыңыз! <<<
