Биыл елге белгілі ғалым, техника ғылымдарының докторы, академик, жақсылыққа жаны құмар, адалдықты, әділдікті өміріне тірек еткен Серғазы Жиенқұловтың туғанына 90 жыл толды.
ҚР Ұлттық машина жасау және көлік ғылым академиясының академигі, техника ғылымдарының докторы Серғазы Жиенқұловтың есімі жадымыздан мәңгі өшпек емес. Себебі, ғалымның қарапайым да бекзат, білімді де білікті, мәдениетті де зерделі ұстаз қалпын Қазақстанның зиялы қауымы түгел танып, құрметтейді.
Ол 1933 жылы 29 қазанда Алматы қаласында атақты көпес Байбұланның отбасында дүниеге келген. Бұрынғы өткен бабалар азаматтың бағасын бергенде текті жерден шыққан деп жайдан-жай айтпаса керек. Оның арғы аталары – бір жағы әйгілі Құнанбаймен, екінші жағы Тезек төремен құдандалы игі жақсылар. Алматының сауда тарихын әйгілейтін «Қызыл таң» дүкенін Серғазы Ахметұлының аталары мен Д.Қонаевтың әкесі қатар ұстаған. Ал енді өнер тарихына келсек, біртуар Шара Жиенқұлова – Серғазы Ахметұлының немере әпкесі. Әкесі Ахмет-Сұлтан Байбұланұлы – Ұлы Отан соғысының ардагері. Анасы Сатиш Жақсыбаева ұзақ жылдар Алматы қаласындағы кітапханада қызмет атқарды.
Серғазы Ахметұлының әрдайым үлгі тұтып, өнеге алған адамы атасы Байбұлан еді. Байбұлан Жиенқұлов – қазақтың алғашқы кәсіпкер-көпесі болған елге сыйлы азамат. Оның он үш баласы болған. Тағдырдың тауқыметімен төртеуі ғана тірі қалады. Олар – Мұхамет-Сұлтан, Ахмет-Сұлтан және Міржақып деген ұлдары мен Зейнеш атты қызы еді.
Серғазы Ахметұлы «Ерен еңбегі үшін» медалімен, КСРО ХШЖК күміс медалімен, «КСРО жоғары білім саласындағы жұмыстарда жеткен үздік табыстары үшін», «КСРО өнертапқышы» белгілерімен, ҚР Білім министрлігінің, КСРО Министрлер кеңесінің, БЛКЖО ОК Құрмет грамоталарымен, КСРО Жол қатынастары министрлігінің сыйлығымен, «ҚР ғылымын дамытуға сіңірген еңбегі үшін», «Астанаға 10 жыл» медалімен, ҚР Президентінің Құрмет грамотасымен марапатталған.
Саналы ғұмырын ұрпақ тәрбиелеуге, ағартушылыққа арнаған ғалым-ұстаздың тәлімі мол, өнегелі ғұмыры өзгелерге үлгі.
Оның есімі Байқоңыр өңірінде техникалық маман болып шығатын жастар өмірімен де тығыз байланысты. Ғарышкерлер қаласы атанған Байқоңырдағы Қазақстан стандартымен білім беретін, бүгінгі заман талабына сай техник-механик, техник-технолог, құрылыс технигі, құрылыс әрлеу жұмыстарының шебері, тігінші, байланыс технигі, турист агенті, турист нұсқаушы, автокөлік слесарі, автокөлік шебері және экономист-бухгалтер, заңгер-кеңесші секілді мамандар даярлайтын бірден-бір оқу орны – академик С.Жиенқұлов атындағы Байқоңыр жоғары колледжі.
Ол ашқан білім ордаларының қатарында осы білім беру мекемесі де бар. Алматы қаласындағы Қазақстан-Ресей халықаралық университетінің ректоры, техника ғылымдарының докторы, профессор, ҚР Ұлттық машина жасау және көлік ғылым академиясының, Ресей халықаралық көлік академиясының академигі, ғалым, өз елінің патриоты Байқоңыр қаласында ең алғаш қазақстандық университеттің филиалын ашқан болатын.
2004 жылы академиктің басшылығымен осы университет базасында Байқоңыр «Космос» колледжі ашылып, 2016 жылдың 5 шілдесіндегі бұйрық негізінде академик С.Жиенқұлов атындағы Байқоңыр жоғары колледжі болған еді.
Жуырда мұнда «Серғазы Ахметұлы Жиенқұлов 90 жаста» атты онкүндік іс- шара өткізілді. Онкүндікте тұлға болмысы толық ашылды.
Иә, Серғазы Ахметұлындай ұстаздық биікке көтерілген жанның үлгісі шәкірттері мен жастар үшін өнеге болып қалатыны сөзсіз.
Қымбат БЕРДЕШ.
Байқоңыр қаласы
>>> Біздің Facebook, Instagram парақшаларымыз бен Telegram каналымызға жазылыңыз! <<<
