Қаладағы Абылайхан атындағы №140 мектеп оқушылары «Аманат» партиясының «Ардагерлерді ардақтайық» жобасы аясында Жалағаш ауданы «Таң» ауылының тумасы, Білім беру ісінің құрметті қызметкері, Қазақстан Журналистер одағының мүшесі Темірбек Есжановпен кездесті.
«Дара, даңғыл, кемел жол» тақырыбындағы ашық алаңда кеш қонағы Темірбек Әубәкірұлы бозбала шағынан бастап қазіргі қарттық кезеңге қадам басқан жылдар аралығындағы сан тарау өмір жолынан сыр тарқатты.
Сыр-сұхбаттың «Бозбала кезең, балауса сезім» деп аталатын бірінші бөлімінде нағашы жұртына сәлем бере барып, алғаш ат мінген сәтін еске алған Темірбек ағамыз халқымыздың осындай жөн-жоралғысы бар екенін жастарға ерекше ықыласпен әңгімелеп берді.
Өмірдерегіне көз салсақ, Темірбек Есжанов аймақтың оқу-ағарту саласында көп жыл қызмет етіп, жас ұрпаққа білім мен тәрбие беру ісінде өзіндік қолтаңбасын қалдырған. Әріптестерінің айтуынша, қалалық оқу бөлімі ол кісіні көбіне білім сапасынан, тәрбие жағынан қиындық туындатқан мектептерге қызметке жіберетін. Табанды талап, тынымсыз еңбектің нәтижесі болар, көп ұзамай сол мектептерде оң көрсеткіш қалыптаса бастайтын.
Ашық алаң сыр-сұхбатының «Еңбек және ұстаздық жол» бөлімінде кеш кейіпкерінің еңбек жолы туралы айтылса, «Өмірді қара сөзбен өрнектедім» тақырыбына сай қаламгерлік жолы баяндалды.
Кездесуде Т.Есжановтың ұстазы Әлихан Меңлібаев, ауылдық ардагерлер кеңесінің төрағасы Жалғасбай Өмірбаев сөз сөйлеп, ауылдан шыққан азаматтың алғашқы еңбек жолын комсомол ұйымынан, жұмысшылар комитетінен бастап, ауданның, аймақтың білім саласында абыройлы қызмет атқарғанын, сондай-ақ, шығармашылықпен айналысып, кейінгі ұрпаққа арнап әдеби- көркем, рухани-танымдық дүниелерді өмірге әкелгенін айтты.
«Аманат» партиясы Қызылорда қалалық филиалының атқарушы хатшысы, облыстық мәслихат депутаты Гүлшат Исақызы, Қазанғап атындағы жоғары музыкалық колледждің аға оқытушысы, айтыскер ақын, Мәдениет саласының үздігі Айдос Рахметов, «Әлімсақ» журналы мен «Ұстаз мәртебесі» газетінің бас редакторы Нұрлан Көбегенұлы ардагер ұстаз, қаламгер Темірбек Әубәкірұлының адами құндылықты насихаттауға арналған шығармалары жайлы әңгімеледі.
Ардагер ұстаздар Алтын Болатқызы, Үміт Қажығалиқызы, Гүлзия Жұмағалиқызы, Галина Мүсілімқызы кеш кейіпкері Темірбек Есжановтың білім беру ісіндегі зор еңбегін, сонымен қатар, қоғамдық бастамаларды іске асырудағы ерекше ұйымдастырушылық қабілетін атап өтіп, қиын да қызықты шақтардан естелік айтты. Осы орайда ұстазға деген құрметтің үлгісін көрсетіп, тағылымды іс-шара ұйымдастырған мектеп ұжымына алғыс білдірді.
Ғазиза ӘБІЛДА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
