«Amanat» партиясы Қызылорда облыстық филиалының төрағасы Жандос Базартай бұқаралық ақпарат құралдарының өкілдеріне арналған брифингте «Халықпен бірге!» сайлауалды бағдарламасының жүйелі жүзеге асырылғанын айтты. Жол картасына енгізілген 110 іс-шараның 101-і толық орындалған, қалғаны орындалу сатысында.
Сайлауалды бағдарлама аясында әлеуметтік маңызы бар бірқатар ірі жоба іске асырылған. Атап айтқанда, 10 елді мекен газдандырылып, облысты газбен қамту деңгейі 83 пайызға жеткен. Спорт саласында 6 денешынықтыру-сауықтыру кешені пайдалануға беріліп, халықты спорттық инфрақұрылыммен қамту көрсеткіші артқан.
«Келешек мектептері» ұлттық жобасы аясында 4200 орындық 5 «Келешек мектебі», тағы 3 мектеп іске қосылып, 6 білім ордасына күрделі жөндеу жұмыстары жүргізілген. Сапалы ауызсумен қамту бойынша жүргізілген жұмыстар нәтижесінде 2025 жылы облыс халқы орталықтандырылған ауызсумен 100 пайыз қамтылған.
Сонымен қатар денсаулық сақтау, мәдениет, тұрғын үй құрылысы, жол және жылу желілерін жаңғырту салаларында да ауқымды жұмыс атқарылған. Өткен жылы азаматтарды тұрғын үймен қамтамасыз ету жоспары артығымен орындалған.
Өңірде 1 аудан, 56 ауылда әкім сайлауы өтіп, барлығында «Amanat» партиясынан ұсынылған үміткерлер жеңіске жеткен.
Партиялық бақылау комиссияларының аймақтық және аумақтық деңгейде 94 отырысы өтіп, 566 ұсыныстың 400-і орындалған. Жол картасында көрсетілген 84 нысанға партиялық бақылау бекеттері орнатылып, бүгінгі күні 80-і пайдалануға берілген. Барлық деңгейдегі мәслихатта фракциялардың жұмысы жолға қойылған.
Нақты практикалық шешімдерді әзірлейтін диалог алаңдарына айналған партия жанындағы кеңестерде қаралған 124 мәселе бойынша 435 ұсыныс тиісті органдарға жолданған.
Қоғамдық қабылдау бөлмелеріне 8212 арыз-өтініш түсіп, олардың 60,5%-ы оң шешілген, заңнамалық түсіндірмелер мен құқықтық кеңестер берілген.
«Ауыл аманаты», «Жер аманаты», «Қарызсыз қоғам» жобалары бойынша атқарылған жұмыстар да нәтижелі.
Белсенді жастардың облыстық және республикалық маңызды жобалары сәтті жүзеге асырылып келеді. «Жастар рухы» жастар қанатының облыстық филиалы республика бойынша үздік деп танылған.
Қорытындылай келе, Жандос Базартай партия филиалы алдағы кезеңде де халықпен тығыз байланыста жұмыс істеп, сайлауалды уәделердің толық орындалуын қамтамасыз етуге күш салатынын атап өтті.
