Жылдам әрі сапалы қызмет көрсетуге қауқарсыз ел артта қалады. Сондықтан, мемлекеттік басқаруда жаңа технологияларды енгізу – кезек күттірмейтін мәселе. Оны электрондық форматқа ауыстыру да тұрғындарды әуре-сарсаңнан құтқарып, ашықтық пен жариялылықты қамтамасыз етуге мүмкіндік береді. Осы және салаға қатысты өзге де мәселелер «Азаматтарға арналған Үкімет» мемлекеттік корпорациясының облыстық филиалында өткен жиында талқыланды.
Басқосу облыс бойынша көліктік бақылау инспекциясының басшысы Нажмадин Шамұратовтың жетекшілігімен өтті. Спикер мемлекеттік көрсетілетін қызмет саласындағы заңнаманың сақталуы қатаң қадағалауда екенін жеткізді.
– Президент Қасым-Жомарт Тоқаев мемлекеттік қызметтерді ашық және тиімді ұсынуды жүктеді. Басым бағыт бойынша жұмыс тиісті деңгейде жүзеге асырылуда. Бүгінде инспекция автомобиль, темір жол және су көлігі саласында 18 мемлекеттік қызмет ұсынады. 30 қыркүйекке дейін 1769 қызмет көрсетілген. Инспекция қазір «Азаматтарға арналған Үкімет» МК облыстық филиалымен бірлесе жұмыс жүргізуде, – деді Н.Шамұратов.
Шарада техникалық қарап-тексеру бойынша ҚР заңнамасына енгізілген түзетулер түсіндірілді, сондай-ақ мемлекеттік қызмет көрсету барысында туындайтын проблемалық мәселелер қаралды. Жиын қорытындысында салада қандай да бір заңбұзушылық орын алмас үшін осындай түсіндірме жұмыстарын жиі ұйымдастыру тапсырылды.
Мөлдір Қалымбет.
>>> Біздің Facebook, Instagram парақшаларымыз бен Telegram каналымызға жазылыңыз! <<<
