Әдеп жөніндегі кеңестің кезекті отырысы өтті. Кеңес төрағасы Н.Талқанбаев күн тәртібіндегі 5 мәселені таныстырды. Кеңес мүшелері әуелі облыстық денсаулық сақтау басқармасының басшысы Ж.Абдусаметовтің өзі басшылық жасап отырған құрылымда мемлекеттік қызмет және сыбайлас жемқорлыққа қарсы іс-қимыл туралы заңнамалары, Әдеп кодексі бұзушылықтарының профилактикасы бағытында атқарылып жатқан жұмыстар туралы есебін тыңдады. Басқармада сыбайлас жемқорлықтың деңгейін төмендету бойынша медициналық ұйымдармен бірлескен іс-шара жоспары бекітіліп, жұмыстар атқарылуда.
Мәселен, «Ақмешіт – адалдық алаңы» жобасы аясында биылғы жылға арналған денсаулық сақтау саласында тұрмыстық сыбайлас жемқорлықтың деңгейін төмендету бойынша іс-шаралар жоспары бекітіліп, жобалық топ жұмыс жүргізуде.
Заң бұзушылықтардың алдын алу және болдырмау мақсатында облыстың денсаулық сақтау саласында көрсетілетін 20 мемлекеттік қызметтің 17-сі толығымен автоматтандырылған. Қалған 3-і жыл соңына дейін автоматтандырылады. Емханалардағы еңбекке жарамсыздық парағы мен медициналық анықтамалар ақпарат жүйесіне енгізіліп, QR-кодпен берілуде. Бұл жүйе анықтамалардың шынайылығын мобильді қосымшасы арқылы тексеруге мүмкіндік беріп, тұрмыстық сыбайлас жемқорлықты жоюға септігін тигізетіні сөзсіз. Тұрғындарға көрсетілетін медициналық көмектің қолжетімділігін және сапасын арттыру мақсатында бас дәрігерлердің ішкі аудит жөніндегі орынбасарлары 1-қабатқа орналасып, азаматтарға күнделікті қоғамдық қабылдау жүргізеді.
Басқармаға түскен арыз-шағымдар «Тұлғалар өтініштерін бірыңғай есепке алу» автоматтандырылған ақпараттық жүйесінде тіркеліп, жауап беру мерзімінің сақталуы бақылауға алынған. Жыл басынан бері денсаулық сақтау басқармасы мен медициналық ұйым қызметкерлеріне байланысты сыбайлас жемқорлық сипатындағы заң бұзушылық тіркелмеген.
Комиссия мүшелері атқарылып жатқан жұмыстарға оң бағасын бере отырып, денсаулық сақтау мекемелерінде электронды қызмет үлесін арттыру, сондай-ақ басқарманың интернет сайтында мемлекеттік сатып алулар бойынша толыққанды ақпараттарды орналастыру жөнінде ұсыныстарын айтты.
Келесі кезекте облыстық қазынашылық департаментінің Әдеп жөніндегі уәкілі Ә.Есқараевтың 2019 жылдың 10 айында атқарған жұмыстары туралы есебі тыңдалды.
Департаментте Әдеп кодексіне сәйкес стандарттарды сақтау бойынша түсіндірме жұмыстары жүргізілуімен қатар, Әдеп нормаларын бұзудың алдын алу мақсатында, мемлекеттік қызметкерлердің әдептілік деңгейін жоғарылату үшін семинарлар өткізілген. Оған ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыс бойынша департаментінің, «Nur Otan» партиясы облыстық филиалы сыбайлас жемқорлыққа қарсы қоғамдық кеңесінің мүшелері, облыстық мәслихат депутаттары қатысқан. Әдеп жөніндегі комиссия мүшелері облыстық қазынашылық департаменті ұжымы әр уақытта жақсы бастамаларымен көзге түсіп жүргенін атап өтіп, тиісті ұсынымдарын енгізді.
Үшінші мәселе бойынша Арал ауданындағы жергілікті атқарушы органдардың бірыңғай тәртіптік комиссиясы жұмыстарының нәтижелері қаралды. Мұнда бірқатар мемлекеттік қызметкерге аудандық Тәртіптік кеңес тарапынан берілген тәртіптік жаза осы комиссия мүшелерінің келісімінсіз алып тасталған. Әдеп жөніндегі кеңес мүшелері оның заңға қайшы екенін айтып, Арал аудандық Тәртіптік кеңес төрағасы Н.Боқаевқа жол берілген заңсыздықты жоюды тапсырды.
Бұдан кейін Арал-Сырдария бассейндік инспекциясы басшысының орынбасары Ж.Нұрсейітовтің тәртіптік ісі қаралды. Оның бұрынғы әріптесі жұмыстан тыс уақытта кездескен кезде Нұрсейітовтің өзіне тіл тигізіп, балағаттағанына шағымданған. Бұл жайға куәгер болғандар бар. Комиссия мүшелері мемлекеттік қызметкер қызметтен тыс кезде де әдеп нормаларынан ауытқымауы тиіс екенін алға тартып, Нұрсейітовке «сөгіс» түріндегі тәртіптік жаза қолдану туралы ұсыныс берді.
Күн тәртібіндегі соңғы мәселе бойынша Қазалы ауданы Әйтеке би кентінің әкімі Ж.Мұратбаевтың тәртіптік ісі қаралды. Ол тұрғын үйді жекешелендіру барысында кейбір заңсыз әрекеттерге жол берген. Атап айтқанда, 2016 жылы мемлекет меншігіне алынған қызметтік пәтерді жекешелендіру жөнінде шешім шығарған. Әдеп жөніндегі кеңес мүшелері жан-жақты талқыланған бұл тәртіптік іс қорытындысымен Қазалы ауданының әкіміне мемлекеттік қызметте теріс қылықтарға жол бергені үшін Ж.Мұратбаевқа «атқаратын мемлекеттік лауазымынан шығару» түріндегі тәртіптік жазаны қолдануды ұсынды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
