Жуырда облыс орталығындағы «Шаңырақ» кешенінде «Қазақстанның үздік тауары – 2019» өңірлік көрме-байқауы өтті. Үздіктерді облыс әкімінің орынбасары Мұрат Имандосов марапаттады.
Биылғы көрмеге 50 тауар өндіруші өз өнімдерін алып келді. Облыс әкімдігі мен кәсіпкерлер палатасы ұйымдастырған шараға кәсіпкерлер палатасы Өңірлік кеңесінің, «Атамекен» ҰКП Іскер әйелдер кеңесінің мүшелері, қаржы институттарының өкілдері мен аймақ кәсіпкерлері, сондай-ақ облыс тұрғындары қатысты. Жалпы, «Қазақстанның үздік тауары» көрме-байқауы жаңа тұтынушыларды таба отырып, іскерлік байланыстар орнатуға арналған бірегей шара болып табылады.
Ел нарығын бәсекеге қабілетті өніммен толықтыруға жәрдемдесуге, кәсіпкерлердің отандық өнімнің сапасын арттыруға бағытталған «Қазақстанның үздік тауары» көрме-байқауы Мемлекет басшысының Жарлығымен 2006 жылдан бастап өңірлік және республикалық деңгейде ұйымдастырылуда. Президенттік «Алтын сапа» сыйлығы мен «Қазақстанның үздік тауары» байқауын ұйымдастырып, өткізу 2015 жылдан бастап «Атамекен» Ұлттық кәсіпкерлер палатасына берілген болатын.
Облыс әкімінің орынбасары М.Имандосов пен сарапшылар алдымен көрме-байқауды аралап, жергілікті тауар өндірушілердің өнімдеріне бағасын берді.
Облыстық кәсіпкерлер палатасының директоры Ғалымбек Жақсылықов биылғы байқауға аймағымыздағы жеке кәсіпкерлердің белсенділікпен қатысқанын жеткізді. Оның айтуынша, «Қазақстанның үздік тауары» көрме-байқауының ең үздіктері үш аталым – «Өндірістік мақсаттағы үздік тауарлар», «Халық тұтынатын үздік тауарлар» және «Үздік азық-түлік тауарлары» бойынша анықталады.
Байқауға қатысушылардың өнімдерін бизнес пен мемлекеттік орган өкілдерінен тұратын сарапшылар бағалады. Нәтижесінде 3 аталым бойынша 9 жеңімпаз анықталды.
Айтулы байқауда «Мәди Қажы», «Қазақстандық Мұнай-химиялық Кемикал Компаниясы» және «Шиелі-Тас» серіктестіктері «Өндірістік мақсаттағы үздік тауарлар» аталымы бойынша топ жарды. «АС-КА» ЖШС, жеке кәсіпкер «Бильсариева Гүлзат» пен ЖК «Шак-Ди» «Халық тұтынатын үздік тауарлар» аталымын иеленді. Ал «Үздік азық-түлік тауарлары» аталымында «Браунис-Қазақстан» мен «Абай-Дәулет» ЖШС-лары, сондай-ақ, жүгері сусынын өндіретін жаңақорғандық жеке кәсіпкер «Әбділла» үздік деп танылды. Үздіктерге естелік сыйлық пен байқаудың республикалық кезеңіне жолдаманы облыс әкімінің орынбасары М.Имандосов тапсырды.
Сондай-ақ, шараға қатысушылар Шиелі, Қазалы аудандары мен Қызылорда қаласының тігінші-кәсіпкерлері: Тоғжан Мұсаева, Сәуле Кенжеева, Гүлзат Бильсариева, Динара Шакирова, «Жанзере» ЖШС, «АС-КА» ЖШС тіккен ұлттық, заманауи және арнаулы жұмысшы киімдерінің көрсетілімін тамашалады. Соңында көрмеге келген көпшілікке лоторея ойыны ойнатылды.
Жеңімпаздардардан өзге көрме-байқауға өнімдерін әкеліп, белсенді қатысқан кәсіпкерлерді кәсіпкерлер палатасының директоры Ғалымбек Жақсылықов пен кәсіпкерлік және туризм басқармасының басшысы Фердоуси Қожабергенов Алғыс хатпен марапаттады.
Шараға тәжірибесі мол тауар өндірушілермен бірге енді талаптанып отырған кәсіпкерлер де қатысты. Оны көрмені аралау кезінде бағамдадық. Олардың өнімдері халық арасында жақсы сұраныста. Иә, көрме-байқауға қатысушылар қатары жыл сайын артып келеді. Мәселен, аталған байқауға 2016 жылы 17 жергілікті тауар өндіруші, 2017 жылы – 22, ал, өткен жылы барлығы 33 кәсіпкер қатысқан. Биылғы жылы өңірлік байқауға аймақ кәсіпкерлігінің түрлі саласынан 50 тауар өндіруші қатысып, келушілерге өз өнімдерін насихаттады. Шарада қала тұрғындары мен қонақтар жергілікті компаниялардың өнімдерімен танысып қана қоймай, тауарды өнім өндірушілер бағасымен сатып алуына мүмкіндік жасалды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
