Қызылорда қаласында Елбасының «Рухани жаңғыру» бағдарламасының «Ақпарат толқыны» кіші бағдарламасы және Қызылорда қаласының 200 жылдығы аясында арнайы http://www.qorda.kz/ сайты өз жұмысын бастады.
Үкіметтік емес ұйымдар арқылы «Арнайы сайт жұмысын үйлестіру» жобасы бойынша жасалған интернет-ресурсты «Ұшқыр жебе» ҚҚ ұйымы әзірлеп, жергілікті бюджеттен қаржы бөлінді.
Жоба жетекшілері осы арқылы жерлестеріміз бен қала қонақтарына ақпараттық қолжетімділікті қалыптастыруды көздеп отыр.
Осы мақсатта сайтта қаладағы әлеуметтік нысандар, мәдени ошақтар, ойын-сауық орталықтары, демалыс орындары, саябақтар, мейрамханалар мен қонақ үйлер секілді қажетті барлық нысандардың мекен-жайы көрсетіліп, олар туралы ақпараттар берілген.
Интернет-ресурстан Қызылорда қаласының 200 жылдық мерекесі аясында ұйымдастырылатын шаралар туралы толық ақпарат алуға болады.
Елбасының «Рухани жаңғыру» бағдарламасының «Ақпарат толқыны» кіші бағдарламасын жүзеге асыруға бағытталған аймақтағы алғашқы интернет-ресурста қала әкімдігінің әлеуметтік желілердегі (Facebook, Вконтакте, Іnstagram, Qyzylorda Open) парақшаларына тікелей кіруге мүмкіндік жасалған.
Қалалық ішкі саясат бөлімі мамандарының айтуынша, жақын күндері «Ақылды қала» жобасы аясында «Q City» атты мобильді қосымшасы іске қосылады. Қосымша арқылы қала әкімдігімен тікелей байланыс жасап, түрлі салаға қатысты мәселелерді шешуге мүмкіндік туады.
«СБ» ақпарат.
>>> Біздің Facebook, Instagram парақшаларымыз бен Telegram каналымызға жазылыңыз! <<<
