Жуырда Ә.Тәжібаев атындағы облыстық ғылыми кітапханасында «Ауыл шаруашылығы кешеніндегі қазіргі заманғы сыбайлас жемқорлыққа қарсы тетіктер» тақырыбында ғылыми – тәжірибелік конференция өтті. Жиынды Мемлекеттік қызмет істері және сыбайлас жемқорлыққа қарсы іс-қимыл агенттігінің облыс бойынша департаментінің басқарма басшысы Бағдат Ізкенов жүргізді.
– Елбасы 1997 жылы еліміздің 2030 жылға дейінгі дамуын айқындайтын ауқымды стратегиялық құжатты бекітіп, онда басым бағыттардың бірі ретінде сыбайлас жемқорлықпен батыл әрі аяусыз күресті айқындап, атап көрсетті. Ал, 1998 жылы ҚР «Сыбайлас жемқорлықпен күрес туралы» Заңы қабылданды. Бүгінде аталған Заңның аясында қоғам «дертімен» күрес күшейтіліп келеді, – деді Б.Ізкенов.
Бұдан соң еліміздегі сыбайлас жемқорлықпен күрес жолында азаматтық қоғам мен саяси партиялардың белсенді іс-қимылы баяндалып, атқарылған шаралар бейнеролик арқылы көрсетілді.
Шарада «Нұр Отан» партиясы облыстық филиалы төрағасының орынбасары Ержан Байтілес келелі ойларымен бөлісті. Партияның сыбайлас жемқорлыққа қарсы 2015 – 2025 жылдарға арналған іс-қимыл бағдарламасының шеңберінде қоғамдық бақылаудың аясы кеңейіп, түйткілді мәселелерді ашық талқылау арқылы қоғамдық ортада партияның ықпалы артып отырғанын атап өтті.
Конференцияда Балтабай Ысқақов, Жалғас Нысанұлы, Сағытжан Керімов сияқты ауыл шаруашылығы саласының ардагерлері сөз сөйледі. Аға буын өкілдері адами қасиетті берік ұстап, адал еңбекпен абыройға бөленудің түп-төркіні ең алдымен отбасындағы тәлім-тәрбиеден бастау алатынын, одан әрі қоғамдық ортаның ықпалы болатынын айтты.
Сонымен қатар, департаменттің басқарма басшысы Бағдат Ізкенов, агроөнеркәсіп кешеніндегі мемлекеттік инспекция комитетінің облыстық аумақтық инспекциясы басшысының міндетін атқарушы Жанат Дүзелбаева хабарлама жасады.
Конференцияда айтылған ұсыныс-пікірлер назарға алынып, сыбайластықты жою шараларын одан әрі жетілдіру, сонымен қатар, рухани жаңғыру бағытындағы кешенді бағдарламаны барынша сапалы іске асырудың маңыздылығы айтылды.
Ғазиза ӘБІЛДА,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
