Ұрпақ сабақтастығының алтын тінін үзбеген, көпке сыйлы, ағайын-туысқа беделді, айналасына абыройлы отбасылардың бірі – Сырдария ауданы Шіркейлі ауылындағы Мақашовтар. Біләл Мақашов – Сырдария ауданының құрметті азаматы. Ұзақ жыл бойы ұстаздық етіп, зейнетке шыққан. Білім саласының үздігі.
Ол мектеп бітірген бойда әскер қатарына алынды, азаматтық борышын өтеп, елге келгеннен кейін жоғары білімге ұмтылды. Еңбек жолын өзі оқыған білім ошағынан бастады. Талай баланы білім нәрімен сусындатып, болашаққа қанат қақтырды. Жас мұғалімдердің білікті маман болуына септігін тигізді. Өз балаларын да жалған сөйлемеуге, жаман әдеттерден аулақ болуға, бір-біріне кішіпейіл болуға баулыды. Ерте жастан еңбекке тартты. Әкенің ұлағатты жолын үлгі еткен ұрпақтары елге еңбек сіңіріп жүр. Қарапайымдылығымен жан-жағын баурап, сөзі өзгеге қуат, демеу болған азамат көпке тірек болды. Жары Алтын Мақашова – көпбалалы ана. Ауыл мектебінің кітапханасында жұмыс істеді.
Олар 1959 жылы шаңырақ көтерді, 5 бала тәрбиеледі. Бүгінде балалары құтты орындарына қонып, бір-бір шаңырақтың тұтқасына айналды. Ата-ана үмітін ақтап, өздері де ақжаулықты ана, пайғамбар жасына жеткен ел ағасы атанды. Ардагер ұстаз 16 немере мен 5 шөберенің қызығына бөленіп отыр. Береке мен бірлік, ауызбіршілік пен бауырмалдылық қасиетін өмірлік ұстанымға айналдырған отбасы бақыт деген осы деп тұжырымдайды. Алтын апа «Балаға берілетін бірінші тәрбие ата-анасын, туған-туысын, жолдасын сыйлауға үйретуден басталады. Себебі, ата-анасын сыйламаған бала жолдасына да, қоғамға да пайда келтіре алмайды» деген сөзді перзенттерінің санасына құйып өсірді. Жолдасы екеуі ұл-қыздарының болашағы жарқын болуы үшін барын салды. Қатарынан кем етпей өсірді. Бүгінде балалары бақытқа бөлеген қос қарияның көңілі тоқ.
Біләл ата ел ішінде шежірешілігімен де сыйлы. Ол кісі ескі қалашықтар, жаугершілік кезде батылдығымен танылып, ел есінде қалған батырлар жайында, есімі белгілі, белгісіз тұлғалар туралы көптеген аңыз-әңгімелерді біледі. Онысын кейінгі жастарға айтып отырудан жалыққан емес. Көкірегі қазынаға толы ақсақалды іздеушілер де жетерлік. Әңгімесін ұйып тыңдап, түртіп алатындар да кездеседі. Қарияның әкесі де, ата-бабалары да шаңырағына құт дарыған, беделді кісілер болған. Діни сауатты, көкірек көзі ашық кісілердің қасиеті Біләл ақсақалға да берілген.
– «Ұяда не көрсең, ұшқанда соны ілерсің» дейді халық даналығы. Тәрбие отбасынан басталады. Елбасы Нұрсұлтан Әбішұлы Назарбаев «Болашаққа бағдар: рухани жаңғыру» мақаласында ұлттық құндылықтарды ұлықтау керектігін айтты. Екі жас бас қосып, үлкен өмірге қадам басқаннан кейін әрбір іске жауапкершілікпен қарау керек. Бала – байлық, ұрпақ жалғасы. Сондықтан тәрбиені алдыңғы орынға қойған абзал. Бала – жас шыбық. Қалай исең, солай қарай бой түзейді. Жас кезімізде көп қиыншылық көрдік. Ешкім басымыздан сипаған емес. Бірақ мойымадық. Жолдасым екеуміз қиындығы мол жылдарда бірге болып, балаларды жетілдірдік. Бір рет болса да жасыған емеспіз. Біздің бастан өткергеніміз біреуге ертегі көрінуі мүмкін. Дегенмен, ол уақыт өтті. Қазір шүкір ғой. Заман тыныш, барлық мүмкіндік бар. Сондықтан әрбір некенің мызғымас берік болғанын қалаймын, – дейді Біләл қария.
Алып бәйтеректей саялы шаңырақ тамырын тереңге жайған. Біләл ақсақал немерелеріне үлкенді сыйлап, әркез құрмет білдіру керектігін айтып отырады. Жастық шақта ата-анаңа не көрсетсең, қартайғанда ұрпағыңнан соны көресің. Бұл халқымыздың өмірлік тәжірибесінен алынған. Қартын құрметтеген, жасына ізет білдірген елдің әрбір отбасының керегесі кең, шаңырағы биік болары сөзсіз.
Сара Адайбаева,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
