Қорқыт ата атындағы Қызылорда мемлекеттік университетінің ұйымдастыруымен «Сабақтастық. Әділеттілік. Даму» тақырыбында республикалық ғылыми-тәжірибелік конференция болып өтті. Бұл шараға университет студенттерінен бөлек, Қожа Ахмет Яссауи атындағы қазақ-түрік университетінің білім алушылары қатысты. Жастар шығармашылығын ынталандыру және бәсекеге қабілетті болуға тәрбиелеу мақсатында өткен конференция екі бөлімнен тұрды.
Шараға келген қонақтар ең алдымен көрмені аралап көрді. Көрме студент-жастардың ізденіске ұмтылысын аңғартады. Уақыт талабына сай жаңа технологияны меңгеруге, жасыл экономиканы дамытуға ұмтылған жастар жобаларының мазмұны да, тақырыбы да терең.
Көрмеге қатысушы Әуез Манат – «Электр энергетика» мамандығының ІІІ курс студенті. Ол Сыр өңірінде күннен электр энергиясын өндірудің мүмкіндігі мол екенін өзінің жобасына арқау етіпті.
– Әлемде күн, жел энергетикасы тақырыбы өзекті. Бір жылда 365 күн болса, соның 300 күнінде біздің өңірде күн жарқырап тұрады. Демек, күннен электр энергиясын өндіруге, оны тұрмысымызға енгізуге мүмкіндік мол,– дейді ол.
Көрмеге қатысушының бірі Исмайл Жорабаев – «Инженерлік экология» факультетінің студенті. Оның жобасы «Киберқауіпсіздік – заман талабы» деп аталады. «ХХІ ғасырда ІТ құрылым өте қарқынды дамып келеді. Киберқауіпсіздік – уақыт қажеттілігі. Бұл интернет әлемінде хакерлерге қарсы тұра білу. Ең маңыздысы, өз ақпаратымызды сақтай білу» дейді ол.
Көрмеге қатысушы студент Ермұрат Ернардың жобасы да көптің назарын аударды. Ол зәулім ғимараттардың әйнегін тазалау құрылғысын ойлап тапқан. Мұны адам күшімен атқару кейде қайғылы жағдайларға соқтыратыны бар. Студент автоматтандырылған жүйе арқылы әйнектерді тазалауға болатынын көпшілікке өзінің жобасы арқылы түсіндірді. «Менің жобам – «Заманауи электрлі әйнек» деп аталады. Ғылымның дамыған кезеңінде адамның жұмысын жеңілдету, әрі қауіпсіздікті сақтау үшін осы жобаны жүзеге асырсам деймін. Жоба жүзеге асқанда биік ғимараттардың әйнегін адам емес, техника тазалайды» деген студенттің жобасы шынында да сұранысқа ие десек қателеспейміз.
«Тәрбиеші – баланың жүрегі» атты жобаны ұсынған студент Қабылтай Самал технология дамыған тұста адам қызметін робот алмастырады дегенмен, робот алмастыра алмайтын мамандық бар екенін, бала тәрбиесін роботқа тапсыруға болмайтынын мәселе етіп көтеріпті. «Болашақ ұрпағымызды ізгілікке, мейірімділікке, жақсы қасиеттерге тәрбиелеу үшін жүрек керек. Ал, роботта жүрек жоқ. Сол себепті баланы роботқа тапсыра алмаймыз» деген болашақ тәрбиешінің бұл ұсынысы айналасын жылулыққа бөлегендей әсер қалдырды.
Мұнан әрі шара пленарлық мәжіліске жалғасты. Алдымен сөз алған Қорқыт ата атындағы Қызылорда мемлекеттік университетінің ректоры міндетін атқарушы Бақытхан Әбдікәрімов биыл жастар жылы екенін атап айтып, студент-жастардың жеке қабілетін анықтап, ғылымға баулу әрбір ғалым-ұстаздың қасиетті борышы екенін атап айтты. Бұл орайда бүгінгі ұйымдастырылған шараның мәні зор екеніне тоқталды.
Шара соңы білім мен ғылым жолындағы ізденісте жетістікке қол жеткізген студенттерді марапаттау рәсімімен жалғасты.
Г.МАҒЛҰМҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
