Қорқыт ата атындағы Қызылорда мемлекеттік университетінде химия ғылымдарының кандидаты, доцент, Қазақстанның білім беру ісінің үздігі Толыбек Қуанышбаев атындағы химиялық және биологиялық зерттеу ғылым-білім орталығы ашылды. Шараға облыс әкімі Қуанышбек Ысқақов қатысты.
Толыбек Досайұлы – аймақтың ағарту саласында өзіндік қолтаңбасы қалған, іргелі оқу орнының дамуына зор үлес қосқан педагог, ғалым. Ол еңбек жолын 1974 жылы Сырдария ауданы Тереңөзек кентіндегі №36 орта мектепте химия пәнінің мұғалімі ретінде бастап, 1976-1980 жылдары Н.Гоголь атындағы Қызылорда педагогикалық институты химия кафедрасының аға лаборанты болды. 1986-1989 жылдары Мәскеу химия-технология институтында кандидаттық диссертация қорғап, химия ғылымдарының кандидаты дәрежесін алды. 1990-1992 жылдары Қызылорда педагогикалық институтында аға оқытушы, доцент болып қызмет атқарды. 1993 жылдан өмірінің соңына дейін Қорқыт ата атындағы Қызылорда гуманитарлық университетінің жаратылыстану және экология кейін Қорқыт ата атындағы Қызылорда мемлекеттік университетінің жаратылыстану факультетін басқарды. 1997 жылы Білім және ғылым министрлігінің алғыс хатымен, «Қазақстан Республикасының білім беру ісінің үздігі» белгісімен марапатталды.
– Білім мен ғылымның өсіп-өркендеуіне сүбелі үлес қосқан жанның есімін жаңғырту – ұлағатты ұстазға көрсетілген құрмет. «Жақсының аты, ғалымның хаты өлмейді» дейді халық даналығы. Бүгінгідей тағылымды шаралар арқылы кейінгі толқынның бойында ізгілік ұғымын қалыптастыра аламыз. Орталыққа ардақты азамат, білікті ғалым Толыбек Досайұлының есімін беріп, жастардың ғылымға бейімделуіне мүмкіндік жасағаны үшін бауырларына алғыс білдіреміз, – деді аймақ басшысы.
Одан соң орталықтың ашылуына ұйытқы болған Толыбек Қуанышбаев атындағы ғылыми-білім беру жеке қорының өкілі Әскербек Қуанышбаев, химия мамандығы бойынша университет магистранты Әйгерім Сыздықова сөз сөйледі.
Айта кетейік, орталық ғылыми, қолданбалы химиялық-биологиялық зерттеу, физикалық-химиялық оқу, педагогикалық шеберлік зертханаларымен қамтамасыз етілген. Бұл университеттің материалдық-техникалық базасының ұлғаюына септігін тигізіп отыр.
Тағылымды шара «Жаратылыстану және ғылыми білім берудің өзекті мәселелері» атты халықаралық ғылыми-тәжірибелік конференцияға ұласты. Жиында университет ректорының міндетін атқарушы Бақытхан Әбдікәрімов, облыстық мәслихат хатшысы Қылышбай Бисенов ұстаз өмірінің жарқын естеліктерімен бөлісті. Ал жергілікті және шетелдік ғалымдар жаратылыстану бағытындағы білім берудің өзекті мәселелерін ортаға салды.
Сондай-ақ, осы күні білікті педагогтың табысты еңбек жолынан сыр шертетін «Ғалым. Ұстаз. Азамат» атты кітап оқырман қолына тиді.
Назерке САНИЯЗОВА.
>>> Біздің Facebook, Instagram парақшаларымыз бен Telegram каналымызға жазылыңыз! <<<
